كود سبور//

واصل الرجاء الرياضي تضييع النقاط، بتعادل جديد سلبي زيرو لزيرو مع اتحاد التواركة، اليوم الاحد فتيران الخميسات برسم الدورة 28 من البطولة الاحترافية، وخدا كل فريق نقطة واحدة، وولات عند الرجا 42 نقطة ومحتلين المركز 7، والتواركة 35 نقطة ومحتلين المركز 11.

وفنفس الوقت وعن نفس الدورة، خسرو حسنية أكادير مع أولمبيك آسفي فتيران برشيد، وصعابت الأمور عند الحسنية اللي مازال ما قدروش يخرجو من المركز 13 اللي كايلعب باراج الطيوح للقسم الثاني وعندهم 29 نقطة، وآسفي ولات عندهم 42 نقطة ومحتلين المركز 7.

وربحو المغرب الفاسي فريق شباب السوالم بمدينة فاس، بنتيجة واحد لزيرو، والفريق الفاسي ولات عندو 45 نقطة وطلع المركز 5، السوالم بقات عندم 22 نقطة ورجعو للمركز 15 اللي كايطيح نيشان القسم الثاني، وتطوان خداو لهم المركز 14 اللي كايلعب الباراج بعدما ربحو نهضة الزمامرة بنتيجة 3 لزيرو والدكاليين بقات عندهم 44 نقطة ورجعو للمركز 6.

وحقق اتحاد طنجة رباح مهم على شباب المحمدية بنتيجة 2 لواحد، وولات عندهم 34 نقطة، ومحتلين المركز 12، أما المحمدية راه طاحو حيث محتلين المركز الأخير برصيد 5 نقاط، ونهضة بركان بطل المغرب اللي ضمن اللقب قبل دورات، راه ربحو النادي المكناسي بنتيجة 4 لزيرو فمكناس، وولات عند بركان 64 نقطة فالمركز الأول والكوديم عندهم 36 نقطة ومحتلين المركز 10، والفتح الرياضي ربحو الدفاع الحسني الجديدي فالجديدة بنتيجة 5 لزيرو فالجديدة، وولات عند الفتح  47 نقطة ومحتلين المركز الرابع، والجديدة بقات عندهم 39 نقطة ومحتلين المركز 9.