كود -مراكش//

المهرجان الدولي للفيلم فمراكش علّن على لائحة لجنة التحكيم ديال الدورة 22 لي غادي يتنضم بين 28 نونبر و6 دجنبر 2025. هاد اللجنة فيها ثمنية ديال الأسماء كبار جايين من ربعات القارات ومن أجيال مختلفة، وغادي يقيمو 14 فيلم روائي طويل، لي كيشاركو فالمسابقة الرسمية لي كتهدف تكتاشف المواهب الجديدة فسينما العالم،جوائز الدورة غادي يتعلنو عليها فحفل الاختتام نهار السبت 6 دجنبر 2025.

غادي يترأس اللجنة المخرج الكوري الجنوبي بونغ جون–هو، لي دار فيلم Memories of Murder وفيلم Mother وحتى “Parasite” لي ربح الجائزة الذهبية ديال كان و4 جوائز أوسكار. هاد المخرج معروف بالإبداع ديالو فالأسلوب وبالعمق ديال المواضيع لي كيناقش، وقدر يرجّع النقاش بين سينما المؤلف وسينما الجمهور الواسع. وغادي يكونو معاه فاللجنة مجموعة ديال الفنانين العالميين:

كريم عيونوز (البرازيل، الجزائر)
مخرج وكاتب سيناريو وفنان بصري، كيتميز بالجمالية ديال الصورة وبالعمق السياسي فالقصص ديالو. تشهر بفيلم “مدام ساتا” ودار أفلام وصلو للعروض العالمية الأولى فكان، بحال “الحياة الخفية لأوريديس غوسماو” و”لعبة الملكة”.

حكيم بلعباس (المغرب)
مخرج مغربي معروف بأسلوب شاعري وإنساني. من أشهر أعمالو:”خيط الروح”، “أشلاء”، “شي غادي وشي جاي”، “عرق الشتا”، “لو كان يطيحو لحيوط”.أسس “مختبر الصحراء” باش يكوّن الشباب، ومن 2023 ولا مدير للمعهد العالي لمهن السمعي البصري والسينما.

جوليا دوكورنو (فرنسا)
تشهرات بفيلم “جونيور” اللي ربح جائزة الجمهور، ثم فيلم “نيء” لي دار ضجة فالعالم. فيلمها “تيتان” ربح السعفة الذهبية فكان ودار نجاح كبير، وفيلمها الثالث “ألفا” تعرض فكان 2025.

بيمان معادي (إيران)
ممثل ومخرج معروف عالمياً. بدا ككاتب سيناريو، ومن بعد لعب فـ”عن إيلي” و”انفصال” لي ربح أوسكار. شارك فـ”معسكر أشعة إكس”، “13 ساعة”، “6 تحت الأرض”. كيعيش بين لوس أنجلوس وطهران.

جينا أورتيغا (أمريكا)
برعات فدور وينزداي آدامز وربحات جوائز مهمة وترشحات للإيمي والغولدن غلوب. لعبات في أفلام “الصرخة 5 و6″، “X”، “السقوط”، وغادي تبان قريباً فـ”كلارا والشمس”.

سيلين سونغ (كندا)
كاتبة ومخرجة، ترشحات للأوسكار على فيلم “حيوات سابقة”. الأسلوب ديالها عميق وذكي. الفيلم الثاني ديالها “الماديون” كان منتظر بزاف.

أنيا تايلور–جوي (المملكة المتحدة، الأرجنتين)
تشهرات بـ”لعبة الملكة” وربحات عليها بزاف د الجوائز. لعبات فـ”فوريوسا”، “القائمة”، “الرجل الشمالي”، “إيما”، “سبليت”، و”سوبر ماريو”. المشاريع الجاية ديالها فيها “الكثبان الرملية 3″ و”سوبر ماريو غالاكسي”.