كود احمد الطيب ///

البارح 4 نونبر 2022 كانت ذكرى رحيل الحسن الثاني. مشات الطبقة السياسية والعسكرية ووو للضريح فالصباح تترحم وفالعشية كان الحفل الديني.

فهاد الزيارة الترحمية تلاقاو الحلفاء والمعارضين. لكن اللقاء اللي كان مثير جمع عبد الاله بنكيران الامين العام لحزب العدالة والتنمية ورئيس الحكومة الاسبق وعزيز اخنوش رئيس الحكومة الحالي. كنعرفو لمطايفة اللي بيناتهم.

فهاد اللقاء اللي دار بعد ما خرجو من الضريح٬ بنكيران شاف اخنوش قريب ليه. كان مع ناس حزبو ولاخر مع اعضاء حكومتو. رئيس الحكومة الاسبق وفق مصادر “كود” قال لرئيس الحكومة الحالي باسلوبو ما معناه “واش گالو ليك ما تسلمش علي”. طبعا فيها الضحك وفيها الميساج السياسي اللي هو تخصصو.

لكن وفق مصادر “كود” اخنوش كلاشاه فالبلاصة ورد عليه بنفس الرد يشرح مصدر حزبي ل”كود” وقال ليه “واش انت اللي گالو ليك ما تسلمش علي”.

طبعا تسالمو وتهادرو شوية. بنكيران كان خصص عدد من مداخلاتو الاخيرة للهجوم ماشي على حكومة اخنوش ولكن على عزيز اخنوش.

بنكيران كيآخد الرئيس الحالي باللي كيضرب مرحلتو باش كان فالحكومة وكان فيها وزير معاه مكلف بالفلاحة والصيد البحري والتنمية الفلاحية٬ وأخنوش ما عمرو فهم هجوم رئيس الحكومة الاسبق ماشي على الحكومة ولكن على شخصو فالوقت اللي كان كيشكر فيه فالسابق.

الغريب ان الجوج واخا دازت وكدوز بيناتهم حروب طاحنة كتجمعهم امور كثيرة. السياسة كتخسر العلاقات بعض المرات