الرئيسية > آش واقع > ها كيفاش دوزات النقابات فاتح ماي 2021.. مسؤولون نقابيون عاودو لـ”كود” تفاصيل احتجاجهم فثاني عيد شغل فزمان كورونا
01/05/2021 20:30 آش واقع

ها كيفاش دوزات النقابات فاتح ماي 2021.. مسؤولون نقابيون عاودو لـ”كود” تفاصيل احتجاجهم فثاني عيد شغل فزمان كورونا

ها كيفاش دوزات النقابات فاتح ماي 2021.. مسؤولون نقابيون عاودو لـ”كود” تفاصيل احتجاجهم فثاني عيد شغل فزمان كورونا

عفراء علوي محمدي- كود//

أجواء تخليد اليوم الأممي للشغل هذ العام كانت استثنائية تماما بحال العام اللي فات، حيت على الرغم من  أن القيود ترخفات شوية هذ الموسم بالمقارنة مع السنة الماضية، اللي كان كيعرف فيها المغرب حالة من الإغلاق التام، الحكومة منعات هذ العام كذلك مسيرات فاتح ماي، ولزمات على النقابات العمالية باش مايخرجوش.

اخا هكذاك، النقابات الاكثر تمثيلية مالقاتش بديل من أنها تحتج على الوضعية اللي كتعرفها الشغيلة المغربية، ومنها اللي حرصات على الحضور الجسدي من أجل الاحتجاج رغم المنع، وكاين اللي فضل يكون احتجاج عن بعد عبر وسائل التواصل الاجتماعي.

“كود” تواصلات مع الكتاب العامين أو مسؤولين فبعض النقابات الأكثر تمثيلية، باش تعرف كيفاش دازت أجواء تخليد يوم العمال، فأجمعوا كاملين على أن الوضعية تازمات بزاف، مع تعطيل الحوار الاجتماعي واستمرار تسريح الموظفين والاقتطاع من أجورهم وعدم تتبع الحكومة لدعم “كوفيد 19”.

الهوير: احتجاجاتنا كانت حضورية رغم المنع وكان التضييق علينا من القوات العمومية

بالنسبة للكنفيدرالية الديمقراطية للشغل، قال خالد العلمي الهوير، نائب الكاتب العام للنقابة، أنها كانت معولة تنزل للشارع ففاتح ماي، وهاذشي اللي دار، ولو بشكل خافت حيت كان من المخطط ليه تنزل للشارع فمسيرة حاشدة، لكن بعد القرار الحكومي، اكتفت بالتجمع فمكاتب النقابة الجهوية عبر مختلف ربوع المملكة.

وتساءل الهوير، فتصريحو ل”كود”، كيفاش الحكومة كتخلي الاكتظاظ فالطوبيسات والاسواق وفكل بلاصة، لكنها فالمقابل منعات فاتح ماي بموجب قانون حالة الطوارئ الصحية “حتى فالبرلمان خلال التصويت على القاسم الانتخابي ماكانو إجراءات احترازية، كنتساءل ان الحكومة والدولة… وبالتالي كاين استغلال للظرفية”، على حساب هضرتو.

وكشف قيادي نقابة الاتحاد الاشتراكي أن قوات الأمن طوقات مقرات النقابات والساحات، وكانو اشتباكات بحال كيف وقع فمكناس وأكَادير، “ومن بعد ما تمنعنا استمررينا فالاحتجاج كذلك من داخل المقرات، بينما احتجينا امامها فبلايص خرى كثيرا بحال فتنغير والمحمدية”، حسب قولو.

واكد ان احتجاج الكنفيدرالية كانت محكومة باجراءات وقائية صارمة، “ولكن مايمكنش ما نحتجوش، فظل تعطير الحوار الاجتماعي اللي ممكن نرفعو فيه مطالبنا للحكومة، وتسريح الموظفين وطردهم، وعاد منع الاحتجاج السلمي…”كيقول الهوير.

مخارق: كورونا فرضات علينا نحتجو بطريقة افتراضية.. ومئات الآلاف كيعانيو الفقر والهشاشة

وحول كيفاش دوزات نقابة الاتحاد المغربي للشغل فاتح ماي هذ العام، الأمين العام للنقابة، ميلود مخارق، أن الظروف كانت جد استثنائية، فرضات على النقابة الاحتجاج بطريقة افتراضية، خلافا للمسيرات الحاجشة اللي كانت كتدير مع إصدار بلاغ تنديدي بسياسة الحكومة.

وزاد مخارق، فتصريحو ل”كود”، أنه مع كورونا مئات الآلاف فقدو العمل ديالهم، وبالتالي مصدر قوتهم، والحكومة متخدة دور المتفرج من الخرق المستمر لمدونة الشغل من طرف أرباب العمل، وتفاقم عدد المطرودين، وعدم متابعات تادية الدعم المادي، الشي اللي رمى بمئات الالاف إلى الفقر والهشاشة.

وندد الأمين العام بتجميد الحوار الاجتماعي بعد التزام الحكومة باتفاق مكتوب باش يكون اجتماع فابريل حول هذشي لكن مادارش.

لطفي: فهذ السنة طاحو الأجور والقدرة الشرائية.. وفاجعة طنجة أكدات وضعية العمال المزرية

بخصوص احتجاجات المنظمة الديمقراطية للشغل البام، قال كاتبها العام علي لطفي أنها كانت داخل المقرات، كيف كانت تظاهرات افتراضية نظماتها بعض المركزيات النقابية، نظرا للمنع اللي اصدرتو الحكومة لمسيرات فاتح ماي.

وتنظمات تظاهرات على نفس طريقة السنة الماضية فالمقرات فقط، وكانت فيها رسائل قوية موجهة لحكومة العثماني، حسب لطفي.

واعتبر المسؤول النقابي، فتصريحو ل”كود”، أن سنة 2021 عرفات المزيد من ارتفاع الاسعار ديال المواد الغذائية والخدمات والما والضو، فمقابل تدني القدرة الشرائية للطبقة العاملة المغربية، وتراجع كبير فالاسعار، وتجميد الأجور، الشي لي خلا العمال يعانيو الأمرين.

“هذ السنة عرفات كذلك فاجعة طنجة اللي كتاكد على ان العمال كتشتغل فظروف سيئة محفوفة بالمخاطر، وعدد كبير مامسجلينش فالضمان الاجتماعي والحماية الاجتماعية والحكومة تخلات على هذ الجوانب الأساسية، بالإضافة لوضعية المزارعات اللي اجورهم اقل ب40 فالمية من اجور الرجال، والقدرة الشرائية تدهورات بنسبة 30 فالمية وتكليف المعيشة طلعات”، حسب لطفي.

لكن فالمقابل، اعتبر مسؤول نقابة حزب الأصالة والمعاصرة أن المشروع الملكي ديال تعميم الحماية الاجتماعية نقطة ضوء فظل هذ الازمات، بحيث غيستفدو منها جميع المواطنين وكذلك العمال، “وغيتعمم التامين الاجباري عن المرض والتقاعد والتعويضات العائلية والتعويض عن فقدان الشغل وغيتم تدريجيا تحويل الاقتصاد غير المهيكل للاقتصاد المنظم”، حسب هضرتو.

دحمان: درنا احتجاح افتراضي وافتقدنا دفء العلاقات الإنسانية فالوقفات والمسيرات

من جهتو، كشف عبد  الإله دحمان، نائب الأمين العام للاتحاد الوطني للشغل، أن اجواء الاحتجاج تستمد نفسها من الاجواء العامة ديال كوفيد، اللي فرض يكون احفال افتراضي، “الشي اللي جعلنا نفتقد للحس ودفء ديال العلاقات الانسانية والمسيرات مع المناضلين والخطبة في الجموع العامة على مستوى ربوع المملكة”، حسب تعبيرو.

وتابع دحمان، فتصريحو ل”كود”، ان تخليد هذ اليوم بالنسبة للذرع النقابي لحزب العدالة والتنمية جا لتكريس مدى صمود الشغيلة وانتصارها على الوباء، رغم انه كاين إصابات ووفيات، إلا أن الشغيلة، حسبه، صمدات في وجهه وتحداتو، وواخا كانو الاحتجاجات عن بعد “هي فرصة ولو عن بعد باش نستمرو في رسالتنا النقابية لنوصل صوت العمال للحكومة وأرباب العمل.

وزاد “كنقولو للباطرونا أن الشغيلة وقفات معاكم وضحات من اجل استمرارية الانتاج واستمرار عجلة الاقتصاد، لكن فالمقابل كيتم تسريح العاملين والمسؤولين للنقابيين، وهناك من المقاولات اللي عاودات هيكلة وحداتها وطردات عاملين كثال، أما الحكومة فأجهزت على دورة شتنبر وابريل بخصوص فاتح ماي، لكن رغم هذ الأزمات، فحنا كنشيدو بالورش الملكي لتعميم التغطية الصحية اللي جا كخطوة استباقية وذكية فأزمة كورونا باش يستفد منها جل مكونات الشعب المغربي، وعلى راسهم العمال”.

موضوعات أخرى

06/05/2021 21:32

دير راسك فالنخالة ينقبك سفيان. غير على هادي خاص يتحاسب اللي ضصرو النهار اللول . بحري دار شانو من شان محمد السادس. گاليك يتفقد

06/05/2021 21:00

رمضان وكونفينمون (الحلقة 22).. بطل مسلسل “بنات العساس” منصور بدري فحوار مع “كود”: وصلني ألف ميساج بعد وفاة “عزيزي الطيب” وهذشي خلعني وتلفني.. واللي كيتنمرو عليا ماكيضرونيش