كود الرباط//

حصلت “گود” على نسخة من الحكم القضائي الصادر في حق مولات اوطيل بسيدي قاسم، وجوج من الكليان، بتهم كتعلق باعداد وكر للدعارة وعدم تقييد زبون فالسجل ديال لوطيل بالنسبة لمولات اوطيل، وتهمة الفساد بالنسبة لشاب وشابة.

تفاصيل الحكم، فيه اعترافات بلي مولات لوطيل سمحات لجوج يمارسو الجنس، بل اكثر من ذلك كذبات على البوليس وقالت ليهم اوطيل خاوي مكاينش كليان، وبدات تهضر بجهد لكن البوليس بدا كيقلب غرف الفندق حتى وصلو لغرفة مسدودة دقو وحل ليهم شاب كان غادي يبدا العلاقة الجنسية.

اعترافات الشاب والبنت لي معه، كشفات بلي كانو متفقين باش يدوزو ساعة ونصف تقريبا مقابل 100 درهم لمسيرة الفندق، بل اكثر اعترفو بلي المرة الثانية كيتواعدو ف هاد لوطيل.

الاعترافات فمحاضر البوليس فيه كذلك بلي الشاب كيمارس مع البنت بمقابل مادي قدره 200 درهم، وبلي فالمرة الاولى مسيرة لوطيل رفضت تعطيهم غرفة ولكن بعد اخذ ورد عطات ليهم غرفة ب100 dh فمدة ساعة ونصف. لكن المرة الثانية حصلهم البوليس.

مسيرة لوطيل مسجلتش هاد جوج بلي دخلو عندها، وكذلك كذبات حسب محاضر البوليس.
وحكمات المحكمة ابتدائيا على مسيرة اوطيل بعقوبة شهر واحد حبسا وبغرامة مالية قدرها الف درهم، والحكم على المتهمين لي بغاو يمارسو الجنس فلوطيل بشهر واحد موقوف التنفيذ.

هاد الحكم خفيف مقارنة مع الجرم لي ارتكباتو مسيرة الفندق، خصوصًا جريمة اعداد وكر للدعا، لي فيها عقوبة من عام حتى ل5 سنين حبسا وغرامة من 5000 درهم لمليون درهم.

يشار بلي هاد الحكم معندوش علاقة بتصريح وزير العدل عبد اللطيف وهبي، للي قال بلي طلب عقد الزواج من طرف مسيري ومستخدمي لوطيلات ماشي قانوني، واكد كذلك بلي اعتقال صاحبة فندق بسيدي قاسم كان قبل ما يصرح بهاد الكلام. حسب ما قالو فبرنامج نقطة الى السطر على القناة الاولى.

وهبي وضح بلي لوطيل معندوش الحق يسول على عقد الزواج ومخالف للقانون وفيها 3 شهور حبسا وغرامات.