كود هناء ابو علي ////
سبق لباحثين فالحركات الاسلامية حذرو باللي المغرب كيعيش اجواء بحال او كثر من اللي عشناه ف2003 وعطات العمليات الارهابية ل16 ماي فكازا. هاد الشي كتحمل فيه الدولة ومعاها المجتمع مسؤولية مشتركة، شفنا كيفاش تساهل القضاء مع اسلاميين تزادو يوم بعد يوم تطرف وولاو دواعش اليوم.
خرج فيديو لمتطرف اسمو الشيخصار. ما بقاش كيجبد المجتمع ولا كيعطي فيه فتاوى واخا هو ثقافتو بسيطة بزاف٬ وصل لوزير العدل عبد اللطيف وهبي. هاد لوزير كان قال باللي بقاو غير يحلو دمو وصافي. كان كيهدر بلا ما يذكر الاسم على عبد الاله بنكيران الامين العام لحزب العدالة والتنمية.
قبل ما نحطكم فالسياق٬ نكلمو اش قال هاد الداعشي الشيخصار. جبد مرات وزير العدل ودار صورتو وهدر على الخيانة وعلى حقارات كثيرة من معجم قمة فالحثالة.
علاش هاد الهجوم على وهبي؟ حقاش هدر على مسودة مشروع القانون الجنائي وفيه كلام على العلاقات الرضائية. وهبي خاطب التيار المحافظ اللي فيه البي جي دي وغيرو بلغتهم. قال ليهم غادي يبدل القانون اللي كاين اليوم ولا بغاو يطبق اللي كاين فالاسلام فباب “الزنا” واللي خاصو 7 شروط. خاص يكونو 4 ورجال واحرار وعدولا ومسلمين ويقولو باللي شافو مدخلو ….
الاسلاميين باغيي قانون ليوطي يبقى ورافضين تطبيق هاد الشي اللي جابوه علماء كيقدسوهم. من هادو المتطرف الداعشي الشيخصار. اليوم وصل لمرحلة ما عمر شي حد وصلها.
بنكيران عندو مسؤولية معنوية فهاد الشي. مسؤوليتو قائمة. هجوماتو على وهبي قبل حتى ما يطالع على القانون الجنائي والطريقة اللي تابعها عطات لامثال الشيخصار الطريق اللي تيبعوها. الطريق اليوم هو عوض فتح نقاش حضاري كيختاصروه بهجوم وضيع او اتهامات تافهة.
الدولة تساهلات بزاف مع هاد الشيخصار. نهار كان يصور مؤخرات المغربيات كان خاصو يتحاكم بالقانون. بقى كل مرة كيزيد شوية حتى وصلنا للي وصل ليه اليوم.
راه كاينين دواعش كثيرة كتحرك وكتقسم المجتمع. خاص تطبيق القانون ماشي التساهل مع هاد العينات
