كود سبور//
غايتدفن عبد اللطيف أخريف لاعب اتحاد طنجة، الاحد الجاي فمدينة طنجة، وهذا الشي بعدما تسلمت عائلتو الجثمان ديالو من عند السلطات الجزائرية.
وحسب اتحاد طنجة، فتقرر بعد اتفاق مع أسرة اللاعب الراحل عبد اللطيف أخريف، إقامة صلاة الجنازة ديالو يوم الأحد 15 دجنبر بعد صلاة الظهر، وهذا الشي لمنح الفرصة للاعبي ومكونات الفريق والجماهير حضور مراسيم التشييع.
وخدات السلطات المغربية جثة عبد اللطيف اخريف لاعب اتحاد طنجة من معبر 2 بغال الحدودي بين المغرب والجزائر، في منتصف ليلة الخميس-الجمعة بعدما رضخت السلطات الجزائرية لمطالب عائلة الراحل والمغاربة، حيث كانوا الكابرانات كايحاولو يستغلو جثمان الراحل سياسيا، ولكن الخروج المتكرر لعائلة الفقيد والأم ديالو على مواقع التواصل الاجتماعي والرسائل اللي رفعتها جماهير الأندية المغربية في الملاعب الوطنية في مختلف المسابقات المغربية والأفريقية دار ضغط كبير على الكابرانات وأحرجتهم دوليا وعربيا وإفريقيا.
وبعدما تسلمت السلطات المغربية جثة اللاعب عبد اللطيف أخريف من عند السلطات الجزائرية، تم نقل الجثمان من المعبر الحدودي 2 بغال إلى مستودع الأموات بمدينة وجدة، في إطار الإجراءات المتبعة قبل تسلميها للعائلة ديالو.
وكان عبد اللطيف أخريف لاعب اتحاد طنجة، غرق في يوليوز الماضي نواحي مدينة تطوان، ملي كان كايتبحر هو شي صحابو فواحد الباطو ومن بينهم لاعبين في اتحاد طنجة، وبعد اسابيع تلقات الجثة ديالو في المياه الجزائرية بعدما داها البحر، ومن هذاك الوقت والعائلة ديالو كايحاولو استلام الجثمان باش يدفنو ولدهم، ولكن الجزائر كانت كاتعطل في الإجراءات وتماطل.