حكيمة لعروسي كود ///////

بالنسبة للبوركيني في شواطئ فرنسا ، نبغي نوضح ليكم انني مع الحريات الفردية ، اللي بغات تلبس النقاب تلبسو و اللي بغات تتعرا كاع من حقها ماسوق حد ، كل شاة تاتعلق من كراعها.

ولكن صورة المرا اللي لابسة البوركيني وواقفين عليها بوليس فرنسا و هي كتنصل مستفزة جدااا..

اجيو نحللو الامور بالمنطق و بالعقل وحدة وحدة  كون هاديك السيدة متشبتة بالعقيدة ديالها ديال بصح غادي تاخد البروصي اللي عطاوها و غادي تنوض تمشي بحالها ماغاديش تبدا تنصل باش تبكي الناس بحال البصلة ، يا اخوتي ياك كلنا عاقلين على مشاهد تعذيب الكفار للمسلمين في فيلم الرسالة وداك الراجل اللي حاطين فوق منو صخرة وهو تايقول احد احد و عذاب رابعة العدوية ، ومع ذلك تشبتو بمعتقداتهم اما هاديك السيدة راه غير قالو ليها السلام غاتخلصي الفلوس قالت ليهم لااااا … هانا نصل  دابا وخليو ليا وسخ الدنيا … وقال حجيب اح اح احححح وقول اح …  

انا ماتعاطفتش معاها حيت عرفتها غير سينما و المصورين واجدين باش يصورو اللحظة التاريخية وااااإاسلاماه يعرنونا في بلاد الكفر ولالة …

و اختي … واش كتسناي فرنسا تطلق الاذان من لاتور ايفيل ولا دير ليك خطبة الجمعة في قوس النصر ، راه هاديك البلاد عندها قانون و ديموقراطية اي حكم الاغلبية هوما ماباغينش البوركيني على شواطئهم ماشي من حقنا نطالبوهم باسم الحريات الفردية اللي انتي احبيبة ماكتعترفيش بيها لانها فسق وضلال بانهم يخليوك تتساراي عليهم بالبوركيني اللي ملي كتعومي وكيلصق عليك كيولي سيكسي اكثر من كسوة الرقص ديالي  وتؤذي نظرهم بذاك المنظر ، كيفما  ماشي من حق فرنسا انها تطالبنا نديرو بحر للعري التام حيت وليداتنا ماتيقدروش يصبروا الى شافو مرة عريانة و عيالاتنا تايحشمو يشوفو راجل عريان راه هادي بهاديك..

واذا كنت كرهتي معاملة الفرنسيين البشعة رجعي لبلادك و الله هو الرزاق الكريم ، ماتخلياش على دينك يا اختاه من اجل وسخ الدنيا… وملي ترجعي عطينا موعظة حسنة و فهمينا اسس هذا الدين الجديد الذي تتبعينه هذا الدين الذي يسمح لنا بارتداء البوركيني و مساعدة الاخوة على القذف… و جهاد النكاح … وبالمرة سنطالب بانشاء ديسكوطيك حلال فيه موسيقى  بالدف و الامداح و توزع فيه الشاربة و البيرة المشبرة بدون كحول والنادلات يتزوجن زواج متعة وحبذا بعض الجواري الحسان …حلالا طيبا … وبهذا نكسب الدنيا و الاخرة معا نعم معااااااا..

رسائلي للكبار فهما لا الكبار سنا الله يجيب غير اللي يفهمنا ولا يعطيناش.