كود هناء ابو علي///

اليوم الجمعة 31 يناير 2025 مع السبعة ونص بدأ صف كيطوال فزنقة القاضي الياس فحي لمعاريف فكازا. صف على محل “بلبن” اللي فتح هادي ايام فالمغرب.

كيفاش هاد المحل اللي قررات اللجنة المشتركة يوم الثلاثاء 28 يناير 2025 مع منتصف النهار، “إيقاف النشاط مؤقتا” إلى حين تقديم المعني بالأمر بالتزام كتابي مصادق عليه يلتزم بمقتضاه احترام مقتضيات الترخيص”.

طبعا اللجنة المشتركة اللي فيها الداخلية ممثلية فرئيس الملحقة وناس “لونسا” =المكتب الوطني للسلامة الصحية للمنتجات الغذائية” ديال انفا وناس الشؤون الاقتصادية ومقاطعة لمعاريف ممثلة فمصلحة الشؤون الاقتصادية، هدرات على امور اخرى بحال انو عندو رخصة بيع المثلجات ماشي السندويتشات وخاصو الملف الطبي ديال المستخدمين وخاصو وسائل باش يقتل الحشرات وسراق الزيت والدبان وما عندوش باش يغسل لمواعن بالما سخون وما عندوش الوسائل الكافية باش يطفي العافية. فالتقرير تشديد على ان المنتجات الحليبية مجهولة المصدر.

قبل ما نرجعو للخصاص وللي خاصو يكملو بوثائق مصادق عليها وهو ما دارو مول المحل او المسير الاجنبي صهيب تقافي نشوفو اش كتعني عملية اتلاف 100 كلغ من المنتجات الحليبية المجهولة المصدر. فلغة “لونسا” كتعني ان هاد المنتجات الحليبية بحال القشدة اللي كيديروها هادوك صحاب “بلبن” ما عندهاش تيكيتاج” اي ما عندهاش تيكي كتكون فالمنتجات فيها منين جاية واش خدات الرخصة ولا اللا.

وفق مصادر “كود” فهاد المحل تم الترخيص لافتتاحو قبل ما يتوصل بالتراخيص اللازمة من لونسا للوحدة الصناعية ديالو اللي كاينة فاقليم النواصر وان لونسا فهاد المنطقة عطاتو كافة التراخيص٬ غير باش جا فتاتح المحل ديالو فزنقة القاضي الياس فالمعاريف ما تسناش حتى يخرجو ليه دوك التراخيص. وفق مصادر “كود” فالسلطات زارت البارح هاد الوحدة الصناعية بالنواصر وشافت باللي كلشي فيها معلوم المصدر ماشي مجهول المصدر.

وفق مصادر ل”كود” من السلطات المحلية فاعادة فتح المحل جا بعد ما قدم التوضيحات الكافية٬ وستاجب لقرار اللجنة المشتركة بعد ما قدم “التزام كتابي مصادق عليه يلتزم بمقتضاه احترام مقتضيات الترخيص”

حسب مصادر “كود” فحتى دوك الامور اللي متعلقة بالنظافة قدر مول هاد المحل يقادها.

دابا بقى مشكل امني خارجي. خاص شي مواطن يقدم بيه شكاية او شي محل من المحلات القريبة =قهوة او بوتيك= يمشيو للسلطات ويشكيوه بسباب الصف لكبير ولا الفوضى. طبعا السلطات تقدر حتى هي توقف نشاطو ايلى شعرات باللي الزحام اللي قدام المحل يقدر يشكل خطر على المواطنين