كود الرباط//

كشفت مصادر برلمانية لـ”كود” عن كواليس هجوم فوزي لقجع، الوزير المكلف بالميزانية، على شركة 1XBET  المتخصصة في القمار وألعاب الحظ، حيث وصفها بأنها تشتغل بطرق غير سليمة وتضر بالاقتصاد الوطني.

وحسب مصادر “كود” هاد الهجوم اللي دار لقجع، كان بسبب مداخلة عبد الله بوانو رئيس مجموعة العدالة والتنمية لي هضر على هاد الشركة وتكلم على التعديل لي دارت الباطرونا فمجلس المستشارين لي فيه “فرض ضريبة على الدخل من خلال الحجز في المنبع على المكاسب المتحصلة من ألعاب الحظ عبر الإنترنت، والتي مصدرها شركات أجنبية” تعديل تشم فيه بلي كاين حرب بين الشركات الوطنية والمؤسسات المغربية لي كتشتغل فألعاب الحظ ضد شركة 1XBET  الروسية.

هادشي تفسر من طرف بعض المتتبعين بلي اليانصيب والمغربية للألعاب ومالين الكازينوهات دايرين حرب على الشركة وأن اكس بيت، ولكن هاد التفسير لي رايج وضح لقجع حقيقتو.

وقال لقجع، أثناء القراءة الثانية لمشروع قانون مالية 2025 في اجتماع لجنة المالية والتنمية الاقتصادية بمجلس النواب صباح الجمعة، بلي هاد الشركة الروسية كتحرك بطرق غير سليمة، مشددا بلي قطاع الألعاب منظم بشكل واضح والفاعلين فيه وطنيا كيأديو الضرائب.

وكشف لقجع بلي هاد الشركة 1XBET  هي مستشهر فريق الرجاء البيضاوي وعرضت على باقي الفرق الإشهار وكذلك جامعة الكرة لي رفضت.

وقال لقجع: “معرفناش هاد الشركة كيف دايرا”، مشيرا بلي أي شركة خص يكون عندها مقر اجتماعي ومستندات واضحة، مشددا بلي خاص التصدي لهاد الشركة.

وأشار الوزير أن الفاعلين الوطنيين في مجال ألعاب الحظ الذين يؤدون نحو 2.5 مليارات درهم من الضرائب بشكل سلس، عكس ما تفعله شركة 1XBET.

دبا واش غايتم فتح تحقيق ف شبهات تلاعبات مالية كاديرها هاد الشركة، وحتى للي كيتعامل معها فالمغرب ويروجو لأنشطتها، واللي متورطين معها، طبعا، وممكن يكونو فيها شركات كتاخد مارشيات من عند الدولة وعندها شبهات كثيرة فهادشي ديال الحروب الرقمية والتأثير على الرأي العام.