كود العيون ///

نشرنا فيديو لمرا شاركات لحد اللي فات فاحتجاج ضد التلقيح فالرباط. لمرا كانت كتغوت باللي “اللقاح ماسوني”. المصور الصحافي ديال “كود” انتبه بهاد الشي. صورها بهدف ماشي تسويق خطابها٬ بل باش يبين فين وصل الجهل. كان الهدف الفضح ماشي الدعاية.

تنشرات ودارت الاثنين قبل ما حيدناها الثلاث. اكتشفنا ان فئة فهمات باللي دعم لصحاب نظرية المؤامرة. لهاد السبب تقرر حذف الفيديو.

من نهار بدا تسويق نبيلة منيب وصحابها من صحاب نظرية المؤامرة لهاد الخطاب٬ كانت عندنا فكود مسافة ضد هاد الفكر.

من حق الفئة الاحتجاج. من حقها الدفاع على رفض الباص ڤاكسينال او حتى الڤاكسان. كنديرو خدمتنا كاعلام وكنغطيو هاد المظاهرات ولكن مع اخذ مسافة مما يروجونه. فهاد السياق حيدنا فيديو مولات الماسونية وما نبقاوش ندوزو هاد العينة من الخطاب.

فاعتقادنا ان المغرب باش يرجع الحياة كيف كانت خاص اللقاح. خاص تشجيع لمغاربة على اللقاح ماشي على التشكيك. طبعا المشكلة لكبيرة اللي عشناها مؤخرا سبابها غباء تواصل وزير الصحة خالد ايت الطالب. تصرفاتو المتسرعة ضربات “قصة نحاج مغربية” فاللقاح.

دابا الحكومة ناقصاها بزاف البيداگوجيا باش تشرح للمغاربة معنى المناعة الجماعية. خاصها تبدع افكار وتبتكر طرق للتواصل. من حدها فاشلة فهاد النقطة راه كاينين صحاب منيب وداك العشعاشي وصحاب الفايد وناس العدل والاحسان واليسار الراديكالي ومعاهم صحاب بيل كيكس كيديرو السياسة باللقاح وكينشرو الجهل