وكالات//

رغم أن كريستيانو رونالدو عندو أسطول ديال الطوموبيلات الفخمة كيسوا عشرات الملايين، إلاّ أنه ما كيشوفهمش غير كوسيلة ديال التنقل، بل كيشوفهم فرصة للاستثمار. النجم البرتغالي شرح الفلسفة ديالو المختلفة فشراء الطوموبيلات، وقال بأنه كيشريهم بحال اللوحات الفنية النادرة — للعرض ماشي للسياقة.
رونالدو، اللي كيتعتبر من أكبر الأساطير فالتاريخ ديال كرة القدم، عندو أكثر من 40 طوموبيل فاخرة فالكراجات ديالو فالعالم كامل، ولكن نادراً ما كيسوق شي وحدة منهم، على حساب واش قال فحوار مع الإعلامي البريطاني بيرس مورغان فبرنامج “Uncensored” نهار 4 نونبر.
قال رونالدو: “من 3 سيمانات شريت طوموبيلة جديدة، ولكن ماشي باش ندور بيها، شريتها كاستثمار، بحال اللي كيشري لوحة فنية. عمرني ما غنسوقها.”
رونالدو اللي عندو 40 عام، اعترف أنه ما عارفش بالضبط شحال عندو من طوموبيل، ولكن كيقدر يكونو شي 41 أو 42 وربما أكثر. ومن بين أبرزهم كاينين طوموبيلات “بوغاتي” اللي وصفهم بأنهم “وحوش مختلفين”.
ماشي حيث ما كيبغيش الطوموبيلات، ولكن حيث تبدلات الأولويات ديالو. حيث قال باللي الزحام فالطرق والتداريب اليومية خلاوه يبعد على السياقة.
حتى أنه فاش كان فمدريد مؤخراً، داز عليه أسبوع كامل وما فتحش باب الكراج باش يشوف الطوموبيلات ديالو. وقال: “ما بقاتش الطوموبيلات شغف بالنسبة ليا.”
ورغم أنه ما كيسوقهمش، إلا أنه باق كيعشق “بوغاتي” وكيقول عليهم “وحوش”.