كود الرباط//

كيف العادة، ناضو المداويخ من بقايا اليسار ومالين الفكر الخوانجي من أتباع بنكيران وأنصار جماعة ياسين، دايرين حملة مقاطعة ضد طبق مغربي مشهور “الكسكس” كتنتجو شركة مغربية “داري”.

المداويخ مستغلين غياب قوانين كتحمي الشركات المغربية من الاستهداف والتشهير وحملات المقاطعة لي كضر بها وتضر بالاقتصاد الوطني، ناضو دارو حملة ضد داري، هادو هما نفس الأشخاص لي كيشريو منتوجات تركية ولدول غربية كتدعم علنية اسرائيل وتمتدها بالقوة والمساعدات، يستهلكو مع البراني ويضربو المنتجات الوطنية.

شركة داري فبلاغ رسمي كتقول للجمهور المغربي بلي هي الرائد العالمي في تصدير الكسكس وبفضل الجهود المبذولة منذ أكثر من 25 سنة، يتم تسويق منتجات داري المصنوعة في المغرب في أكثر من 60 دولة عبر القارات الخمس.

وجاء في البلاغ: “وإذا كان السوق الإسرائيلي في الماضي يستورد وبكميات قليلة من منتجات داري، فلقد كان ذلك بناء على طلبات فئة من المستهلكين المتشبثين بالهوية المغربية وتقاليدها. ويجذر الذكر بأن هذه المنتجات تم تسويقها كذلك في فلسطين”.

شركة مغربية طلعات النيفو بالتعريف بالكسكس المغربي عالميا، ناضو ليها المداويخ كيف دارو فالمقاطعة كيستهدفوها. حملة غبية وصافي.

المغرب رسميا كيدعم فلسطين عبر عدة واجهات وممحتاجش المداويخ يبقاو يلعبو بمصالح الشركات المغربية وبمصالح اقتصاد بلادنا. هاد المداويخ ميقدوش يقاطعو ماطيشة ولا باقي الخضر والفواكه لي جزء من عملية إنتاجها كيعتمد على شركات إسرائيلية عندها فروع فالمغرب. الاقتصاد هو هذا ميمكنش تزايد بمقاطعة منتوج باش تسمي راسك كتساند فلسطين.

هادشي لي دارو لشركة داري ممكن يتوسع لباقي الشركات المواطنة، واللي كيتمارس عليها الترهيب والضغط فسياق الحرب فغزة وللي الهدف منو عودة الإسلاميين للمشهد بقوة.