كود سعيد الشاوي كازا ///
تفاعلات فضيحة ندوة بجامعة الحسن الاول بسطات فقضية نشر خارطة المغرب بلا صحراؤو من قبل مشاركة اردنية٬ غادية وتخربق.
رئيس جامعة الحسن الاول بسطات عبد اللطيف مكرم خرج البارح فاتصال دارو مع “كود” باللي عز الدين الميداوي وزير التعليم العالي اي الوصي على القطاع ما عيطتش عليه على القضية. ما اتصلش بيه. رئيس الجامعة كان همو ماشي بلادو ماشي لفضيحة ديال فصل الصحراء فخارطة بلادو بل يدافع على بلاصتو. بحال ايلى بغى يبين باللي الوزير راضي عليه ماشي مقلق عليه
بغى يخربق النقاش. يميعو. راه كلامو وتصريحو فضيحة اخرى. اولا لاش كيصلاح هاد الميداوي ايلى ما تحركش وعرف اش وقع فحادثة خارطة بلادو بلا الصحراء. واش هاد الميداوي ما كيتسوقش لهاد الامرالخطير؟
ثم هاد رئيس الجامعة علاش خارج كيهدر غير على خبر استدعاؤو من قبل الوزير من عدمو٬ راك خاصك تتحاسب على هاد لفضيحة. انت اللي عرضي علي الوفد المشارك اللي كيمثل جامعة نايف. انت المسؤول الاول على هاد لفضيحة اللي دارتها ادرنية من اصل سوداني.
لمغاربة كينوضوها فالعالم على اي مسؤول واخا حكومي ينشر خارطة بلادهم بلا صحرا وانت يا رئيس جامعة الحسن الاول جايب اللي يهين لمغاربة فبلادهم. راك عارف باللي سيدنا فخطاب 20 غشت 2022 بمناسبة الذكرى 69 لثورة الملك والشعب حدد علاقتنا كمغاربة مع العالم فقضية الصحرا. قال بوضوح “أوجه رسالة واضحة للجميع : إن ملف الصحراء هو النظارة التي ينظر بها المغرب إلى العالم، وهو المعيار الواضح والبسيط، الذي يقيس به صدق الصداقات، ونجاعة الشراكات”.
ودابا خاص هاد المعيار يطبق ويتحمل رئيس جامعة الحسن الاول بسطات ووزير التعليم العالي مسؤوليتهما. سيدنا واضح. اما داك التبرير ديال خطأ الجامعية الاردنية واعتذارها راه ما شادش. علاش؟ هادي جامعية وكتقدم مداخلتها فجامعة. ابسط حاحة كيطلبها البحث العلمي هو الصرامة. راها ماشي مديرة شركة جاية تقدم منتوج ومشات عند شركة علاقات عامة وجابت ليها خارطة من كوكل. هادي راها جامعية. بقدر الصرامة اللي كاينة فالبحث العلمي خاص تكون ضد رئيس الجامعة وضد وزير التعليم العالي ديال حزب الاصالة والمعاصرة.
