عفراء علوي محمدي- كود//
غير فهذ اليومين اللولة درمضان، القنوات التلفزية المغربية “دوزيم” و”الأولى” استقطبو 75 فالمية ديال المشاهدات دالمغاربة اللي كيتفرجو فالتلفازة والمنتوج السمعي البصري المغربي فوقت الذروة (يعني فوقت الفطور)، بينما 25 فالمية اللي بقات كانو فهذ الوقت كيتفرجو فالقنوات الفضائية اللي كيتجاوز العدد ديالها 1000 قناة.
وهذشي أكداتو القناة “دوزيم”، فبلاغ ليها اليوم توصلات بيه “كود”، اللي كشفات فيه كذلك بللي سجلات غير بوحدها 55 فالمية من المشاهدات اللي تسجلو فوقت الذروة، وهذشي كيرجع أساسا لنسبة المشاهدات الكبيرة اللي سجلاتها كل من الكاميرا الخفية “مشيتي فيها” ب14 مليون و500 ألف مشاهدة، وسيتكوم “الكوبيراتيف” ب12 مليون 500 ألف مشاهدة، وكتقول “دوزيم” بللي هذو أعلى النسب اللي حققاتها ديال المشاهدات مللي دارت مقياس المشاهدات الإلكتىوني ف2008.
بالنسبة للمسلسلات الأخرى والسيتكومات والبرامج اللي برمجاتهم “دوزيم” فهذ رمضان، فالمسلسل المغربي “السر المدفون” سجل 7 مليون و300 ألف مشاهدة، “فين غادي” سجل 9 مليون و400 ألف مشاهدة، “ألو مي” 5 مليون و800 ألف مشاهدة، 10 مليون و700 ألف مشاهدة ل”تستاهلو كل خير”، “الدين والناس” 7 مليون و900 ألف مشاهدة، “أسئلة حول فيروس كورونا” 5 مليون مشاهدة، “الورث” 5 مليون و900 ألف مشاهدة، “الغريبة” 4 مليون و100 ألف مشاهدة، 7 مليون و100 ألف مشاهدة ل”الطوندونس”، و7 مليون ل”الكورسة”.