كود  ـ مراكش//

تفاجؤُ ناس دوّار السراغنة نواحي مراكش بواحد الراجل لابس حوايج ديال العيالات “النقاب” وكيّدير شي تصرّفات خلاتهم يشكو فيه، وهذا اللي خلا بزاف ديال الناس يتبعوه ويشوفو شنو كيدير بالضبط.

ناس من الدوّار ديال السراغنة، اللي بعيد بشي 8 كيلو متر على مراكش، قدرو يحاصرو هاد السيد حدا السكة ديال التران، بعدما شكو فيه حيت كان  مستريسي ومنكري.

المشتبه فيه حاول يشرح للناس علاش لابس النقاب، وقال ليهم: “أنا عندي هاد المشكل… عزيز عليا النقاب أنا غير جاي نصوّر التران” .

البوليس، مني وصلتهم الخبار، جاو مباشرة لبلاصة، وقبلو عليه وداوه  لمركز الدائرة الأمنية 16، باش يسمعو ليه ويديرو محضر رسمي فالواقعة، ومن بعد يشوفو الإجراءات القانونية اللي غادي يديرو معاه إلا كان ناوي على خزيت.