كود كازا سعيد الشاوي ///

البارح لثلاث 16 اكتوبر 2024 تقربلات فلجنة المالية بجماعة الدار البيضاء. كان التشريار بالكيسان والميكروفون.  كلشي بدا٬ كيف نشرات البارح “كود”٬ بنقاش بين عبد الإله الصفدي رئيس لجنة المالية وعبد الصمد حيكر، عن حزب العدالة والتنمية من حزب المعارضة.
البلطجة كيف نقل مصدر “كود” دارها حيكر. 

ولكن علاش؟ كيفاش هاد المنتخب اللي كان مسير لمجلس الدار البيضاء مكلف بالتعمير٬ تحول وتصرف بحال البلطجية؟ 

وفق مصادر “كود” كلشي عندو علاقة بالميزانية الجديدة للدار البيضاء. باش كانو فالتسيير وصلات للميزانية ل3 مليار ولكن هاد العام مع المجلس الجديد طلعات ل5 مليار. حسب منتخب ل”كود” هاد الشي علاش حيكر اللي مولف كيكون فلجنة التعمير جا للجنة المالية وقربها. “داك الكاس اللي لاحو راه كيبين باللي شي حاجة خرجات من يديه. هاد الحاجة هي الميزانية اللي وصلها هاد المجلس” يضيف مصدر “كود”

دابا شكاية غادية تحط ضدو. من حقو يعارض ولكن بلا بلطجة بلا عنف.