كود الرباط//
قطع مسؤول بمجلس النواب، الشك باليقين، بخصوص وضعية البرلماني محمد بودريقة، رئيس الرجاء البيضاوي، للي تم توقيفو اليوم بألمانيا على خلفية تحقيقات قضائية، وكشف بلي بودريقة عندو باسبور الخدمة وميمكنش البرلمان يحيدو ليه.
واكد المصدر المسؤول ل”گود” بلي بودريقة باقي نائب برلماني بقوة القانون وعندو حقوقو الدستورية ويتمتع بجميع الامتيازات والحقوق لي عند جميع النواب.
وعن سبب عدم تجريد البرلماني بودريقة من صفته النيابية، قال المسؤول ذاته ل”گود” :” ميمكنش نجردوه حتى يدوز عام على غيابه من اشغال البرلمان”، مضيفا “دبا اخرة مرة غاب فيها بودريقة عن البرلمان هو 8 يناير 2024، يعني غادي يكون مكتب مجلس النواب عندو الحق يطالب بتجريد بودريقة من البرلمان يوم 8 يناير 2025 اذا استمر فالغياب”.
كانت مصادر “گود” كشفات بلي كاينا رواية باللي بودريقة باش دخل لالمانيا كانت شكوك على باسبور الخدمة اللي عندو كبرلماني. واحد جايهم من الشرق الاوسط فرحلة مباشرة لالمانيا يعني ساكن فيها٬ طبيعي البوليسي الالماني يشك ويتحقق.
من بعد هاد القضية وبعد البحث على اسم بودريقة باش باللي اسمو كاين فشي قضية معروضة فاسبانيا. يعني كانت شي مذكرة علي المستوى الاوربي تجبد فيها. هنا اش كيديرو فاوربا؟ الامن كيحليها علي القضاء واللي خاصو يحسم بسرعة وديما كيقدم قرينة البراءة ويطلق سراح المعني بالامر. لانو٬ فحالة بوريقة٬ يقدر يطعن فالقضاء الالماني عن طريق محاميه٬ ويمشي للمحكمة الاوربية.
