كود طنجة//

البارح كان افتتاح الموندياليطو فتيران بن بطوطة الكبير فطنجة. افتتاح داز مزيان وحضروه شخصيات. بلا ما ندخلو فالمقارنات ولكن افتتاح يمكن نقارنوه بدول قافزة بحال اوربا.

ولكن المغرب راه بعقلو ماشي مبرهش. ما بغاش يحول هاد الحدث لڤيترين ضد الجزائر كيف دارت معانا فافتتاح الشان للاعبين المحليين،

البارح كان فالتريبون اكسيل بلعباس رئيس جامعة كرة القدم بالقبايل ومؤسس منتخب هاد المنطقة المطالبة بالاستقلال عن الجزائر. حضر ولكن وفق ما علمته “كود”٬ بدعوة من صحابو وما كانش لشي حد من المنظمين علاقة بالموضوع. كان داير شال ديال دولتو وصافي. حتى الراية ديال بلادو ما هزهاش فالتيران

أكسيل، بان فرحان بهاد الافتتاح ودار فيديوهات وصور من ملعب طنجة، خصوصا وأن هاد القيادي في حركة الماك والمقرب من فرحات مهني رئيس حكومة القبايل المنفية، كيجي بزاف للمغرب وكتعجبو المملكة خصوصا مدينة أكادير لي كيمشي ليها بزاف.

وقالت الفيفا تعليقا على الافتتاح لي دار المغرب: “حفل افتتاحي رائع يليق بكأس العالم للأندية طنجة تتزين وتتألق”.

ولكن المغرب ما جابش اكسيل ياخد كلمة فالافتتاح كيف دارت الجزائر باش عطات الكلمة لحفيد مانديلا باش يهاجم المغرب وتخلصو بمائة الف دولار عبر جمعيتو٬ باش يعلن علينا الحرب. اه علن علينا الحرب. البارح فتيران طنجة حتى الكاميرا ما شداتش صاحبنا. جا بشكل عادي وما بغاتش الدولة المغربية تعطي لمجيئو حدث سياسي او حتى رياضي ما بغاتش تعطيه حتى شي حدث