كود – عثمان الشرقي//

انتشرت صور الفنانة الشعبية المعروفة بـ“الشيخة طراكس” بشكل كبير، من مدينة تاراغونا الإسبانية، ولي خلّات ردود فعل كبيرة فمواقع التواصل الاجتماعي، الصور بانت فيها مع القنصل العام ديال المغرب فـتاراغونا، إكرام شاهين، مع عدد من أفراد الجالية المغربية وممثلي قطاع الأعمال.

حسب معطيات متطابقة، حضور الشيخة طراكس ماكانش نتيجة دعوة مباشرة من القنصلية العامة ديال المغرب فـتاراغونا، ولكن جا بمبادرة من رئيسة جمعية مشاركة فتنظيم حفل تقام فـالمدينة، اللي كان منظم بشراكة مع مؤسسة بنكية.

المصادر نفسها كتأكد أن القنصل العام إكرام شاهين ما كانتش هي اللي عرضات على الفنانة، وإنما ظهورها فصور مشتركة معها كيدخل فإطار التفاعل العادي ديال المسؤولة القنصلية مع أفراد الجالية المغربية وضيوف مختلف الفعاليات، ضمن مهامها الدبلوماسية والقرب من الجالية.

القنصل العام معروفة بانفتاحها على الجالية المغربية، باستقبال المواطنين والتفاعل مع الأنشطة الجمعوية والاقتصادية، و مواكبة قضاياهم الإدارية والاجتماعية، فإطار دعم ارتباط الجالية بوطنها.

وتم بالمناسبة تكريم القنصل العام إكرام شاهين، اعترافاً بالمجهودات اللي دارت فيام عملها، وبالجهود فخدمة الجالية وتعزيز العمل القنصلي والتواصل المؤسساتي فمدينة تاراغونا.

وبالتالي، كيبان أن ربط حضور “الشيخة طراكس” بأي دعوة رسمية صادرة عن القنصلية ماعندوش أساس دقيق، حيث المعطيات كتوكد أن المشاركة ديالها جات بدعوة جمعوية، أما دور القنصلية اقتصر على الحضور والتفاعل فإطار المهام الدبلوماسية كيف ديما.