كود – وكالات//

المدير السابق ديال مكتب التحقيقات الفيدرالي الأمريكي، جيمس كومي للبوليس، سلم راسو بسباب تصويرة نشرها ديال كوكياجات فالبحر مرسومين فكَرولاينا الشمالية على شكل “8647”.

فـ15 ماي 2025، نشر كومي هاد التصويرة فـInstagram  وكتب عليها: “شكل زوين ديال الكوكياج فالتسركيلة فلابلاج”، المقرّبين من ترامب  قالو بلّي الصورة فيها رسالة مخبّية كتحرش على الاغتيال.

الرقم 47 كيرمز لترامب حيث هو الرئيس 47، أما “86”، هو تعبير مريكاني كيعني “حيد شي حاجة ولا رميها”. فالأصل هاد الرقم جا من المطاعم ملي كيكون شي منتوج سالا من سطوك، ولكن توسّع الاستعمال ديالو وولات عندو دلالات خايبة .

العبارة “8647” كتستعمل بزاف عند معارضي ترامب فالشعارات والحوايج، كتعبير على موقف سياسي ولكن ترامب كات قال: “اي دري صغير عارف شنو كتعني هاد الأرقام”.

النيابة وجّهات لكومي جوج تهم جنائيات، ديال التهديد بقتل الرئيس، ونشرو فوسائل التواصل، والعقوبة تقدر توصل حتى لـ10 سنين ديال الحبس.

وخا هكاك، خبراء قانونيين كيقولوا بلّي القضية ضعيفة من ناحية الدستور، حيث خاص الادعاء يثبت بلّي المنشور كيشكّل “تهديد حقيقي”، وهو معيار صعيب كانت فرضاتو المحكمة العليا الأمريكية فـ2023.