كود أكادير//

أكادير ولات أغنى مدينة فالعقار فالمغرب والأثمان غادية وكاتزيد وهادشي ولا شي قنبلة موقوتة تقدر تفرگع فأي وقت، بسبب التلاعبات فشراء السكن الاقتصادي.

أكادير رجعات بحال المدن الكبيرة فالعالم فأثمنة العقار حيث متقدرش تلقى بارطمة ديال 30 ولا حتى 40 وهادشي غادي وكايزيد، فحي السلام مثلا الشقق ديال السكن الاقتصادي لي دايرة ليهم الدولة شحال هادي 25 مليون (زائد النوار طبعا يعني كاتوصل حتى 34 مليون) رجعو دابا بـ70 مليون .

أما ايلا مشيتي لأي مشروع عقاري جديد ديال السكن الاقتصادي ولا المويان سطوندينغ ماتلقاش شقة حيث كولشي تباع.

مصدر مهني أكد في تواصل مع”گود” أن هاد الأثمنة الخيالية ديال العقار فأكادير لي صبحات أغنى مدينة فالعقار اكثر من كازا ولا مراكش ولا الرباط او حتى طنجة عندها أسباب كثيرة، أبرز هاد الأسباب لوبي العقار لي محكم فالسوق ماشي بحال مراكش مثلا لي فيها عدد كبير من المنعشين العقاريين وكاينين الاختيارات كثيرة ماشي فحال أكادير لي فيها اللوبي محكم فكولشي.

السبب الثاني وهو الرئيسي يقول مصدر “كود” هو صحاب الكاش لي خازنين الفلوس فالديور لي كايشريو مابين 4 حتى 10 شقق (كيديروهم فسميات ولادهم وعائلاتهم) فأي مشروع باش يعاودو فيهم البيع من بعد مدة .

الغريب أن العقارات لي غاليين بحال الفيلات والشقق الفاخرة ماتزادوش بزاف بحال العقارات الرخاص كايقول مصدر “كود” حيث هاد اللوبي عارف شنو مطلوب .

هادشي وقع مؤخرا، فواحد المشروع حدا الدشيرة الجهادية، حيث واحد الشركة كبيرة فالمغرب شافت أن أكادير قليل فيها السكن الاقتصادي وجات دارت مشروع كبير فيه شقق وبقع ومحلات تجارية ولكن الغريب أن كولشي تباع قبل كاع مايتبنى بسبب صحاب الكاش لي شراو كولشي باش من بعد يبيعو بأثمنة خيالية .

هذا سبب من بين الأسباب لي خص الدولة تحارب الكاش لي كايخرب الاقتصاد ديال بلادنا خصوصا مع الأرقام المخيفة ديال بنك المغرب لي علن على ارتفاع رواج الكاش فالسوق.