كود سبور//

باغيين الوداد الرياضي يديرو مدرب مساعد يكون مغربي فالطاقم التقني ديال المدرب الجنوب إفريقي رولاني موكوينا، اللي كايدرب فالحمرا من شهر يوليوز الماضي، فالوقت اللي كاتروج الهضرة على أن كل من رشيد الداودي وعبد الإله صابر هما اللي مرشحين لهذا البوسط، ولكن هذا الشي ما كاينش.

ونفى مصدر ودادي لـ”كود” كل ما كايروج عن تعيين واحد من الوداديين السابقين رشيد الداودي أو عبد الإله صابر، كمدرب مساعد مع مدرب الفريق رولاني موكوينا، مع العلم أن الثنائي المذكور سبق لهم وخدمو فنفس البوسط خلال فترات سابقة.

نفس المصدر، أكد أن اللي قريب من تولي مهمة مدرب مساعد فالطاقم التقني ديال رولاني موكوينا، هو إطار وطني مغربي وكايعرف البطولة الاحترافية مزيان ولكن ماشي الداودي وصابر.