كود سبور//

كتبقى مشاركة إبراهيم دياز نجم المنتخب الوطني المغربي مرهونة بموافقة الفريق ديالو ريال مدريد الإسباني، وهذا الشي لمح له اللاعب بعدما لعب أول ماتش له مع الأسود البارح الجمعة فماتش ودي ضد منتخب أنگولا.

وهضر إبراهيم دياز على واش غيكون حاضر مع المغرب فأولمبياد باريس الصيف حسب وقال فتصريح لجريدة “ماركا الإسبانية”: “غنحاول نكون فكاع الفرص الممكنة، وفالنهاية أنا كتبقى لاعب ديال ريال مدريد وباغي ندير گاع اللي فجهدي للفريق ديالي والمنتخب الوطني”.

وكمل براهيم دياز الـ10 جديدة ديال المغرب، وهو كيأكد: “أي حاجة غنقدر نديرها، غانعطيها فالتيران وغنكون فرحان بزاف وانا كنديرها”.