گود سبور//

يمكن الإصابة ديال الدولي المغربي أشرف حكيمي نجم باريس سان جرمان الفرنسي، ماشي كلاكاج ساهل ويقدر يحتاج للراحة والعلاج ويغيب على روتور دومي فينال دوري أبطال أوروبا ضد بايرن ميونخ الألماني الأربعاء الجاي، بعدما توعت فماتش الذهاب البارح الثلاثاء.

وحسب معلومات حصلت عليه شبكة RMC الفرنسية، فالفحوصات الأولية اللي تدارت لأشرف حكيمي صباح اليوم الأربعاء، دخلات الشك فاحتمال إصابتو بشي حاجة كبر من كلاكاج بسيط.

وغادي يدير حكيمي فحوصات طبية اخرى اليوم الاربعاء فالعشية، وإلى تأكد أنه عندو غير كلاكاج بسيط راه غادي يبدا يوجد باش يرجع يلعب ماتش الاربعاء الجاي، أما إلى كانت الإصابة أخطر راه ما غاديش يلعب.

وكاتجي هاد الإصابة عند أشرف حكيمي قبل 6 السيمانات من كاس العالم 2026، اللي باغي يشارك فيه مع المنتخب الوطني المغربي وهو الكابيتان.