كود سبور//

قربو الوداد الرياضي من تعيين المدرب الجديد للفريق الأحمر، واللي غيكون بنسبة كبيرة الإطار الوطني عزيز بنعسكر اللي فايت له درب فقطر والمغرب الفاسي وراه تبروبوزا على الوداد الرياضي، باش يدرب الفريق خلال المرحلة المقبلة، ومع واحد من ولاد الواك اللي عطاو للحمرا وعندو احترام من مكونات الفريق سوا اللاعبين والمسيرين وحتى الجمهور.

وحسب ما توصل به موقع “گود” من معلومات، فعزيز بنعسكر من المدربين اللي تطرحو على المكتب المديري للوداد الرياضي، اللي مازال كيقلب على مدرب باش يتولى تدريب الفريق خلال المرحلة المقبلة وكاين هو ومدربين آخرين مرشحين لتدريب الفريق، ولكن بنعسكر هو المدرب الأقرب باش يدرب الواك مؤقتا فهاد الشي اللي باقي من هذا الموسم الرياضي.

وحسب نفس المعلومات فالوداد باغيين يديرو مع عزيز بنعسكر واحد من ولاد النادي، وكيتعلق الأمر ببدر القادوري النجم السابق للفريق الأحمر، واللي عطى بزاف للوداد كلاعب وكيعرف مزيان الدار الودادية، وباغيين يعينوه مدرب مساعد فالطاقم التقني الجديد مع بنعسكر، ومعولين على التجربة ديالو وحيث كيعرف الواك وحتى البطولة، وهذا الشي باش يوقفو نزيف النقاط ويعطيو روح جديدة للفريق، بينما سالا الموسم ويتم تعيين مدرب جديد مع العلم أن بنعسكر يقدر يرجع مدرب مساعد للمدرب الجديد اللي غيجي الصيف الجاي، والقادوري يطلع يخدم فالإدارة التقنية للنادي ضمن مشروع للمستقبل.