كود سبور//

قلب الاتحاد الإفريقي لكرة القدم على تخريجة باش يوافق على مطالب الاتحادات المحلية للإبقاء على 27 لاعب كحد أقصى فلوائح المنتخبات المشاركة فكأس إفريقيا 2023 بالكوت ديفوار، كيفما كان عليه الحال فالنسخة الماضية بالكاميرون، وما يبانش أنه تراجع على أنه ينقص اللاعبين إلى 23 لاعب لكل منتخب فالمسابقة.

وكشفت مصادر مطلعة، أن الاتحاد الإفريقي لكرة القدم، خرج بصيغة فقضية رفع اللاعبين إلى 27 لكل منتخب فكوب دافريك، وقرر إلزام المنتخبات بالمشاركة في كأس إفريقيا بالكوت ديفوار، بلائحة مكونة من 23 لاعب على الأقل، وعند هاد المنتخبات الحق فأنها تزيد 4 لاعبين أخرين إذا بغات بشكل اختياري، باش يوصل الحد الأقصى إلى 27 لاعب لكل منتخب باغي يرفع من عدد اللاعبين ديالو فالمسابقة.

ولكن الكاف فرض على كل اتحاد محلي باغي يشارك المنتخب ديالو فكأس أفريقيا بلائحة فيها ما بين 24 لاعب و27 لاعب، يتكلف بمصاريف السفر ديال اللاعبين اللي غيزيد والإقامة ديالهم، وأي اتحاد محلي غيتأكد أنه دار خروقات فهاد الشي غيتعاقب وغينقصو له 2 لاعبين من الـ23 الإلزاميين إلى 21 لاعب، وغيخلص غرامة مالية قدرها 20 ألف دولار.