گود سبور//

غادي يدوز ملف احداث شغب روتور دومي فينال كاس الكونفيدرالية الإفريقية اللي تسبب فيها جمهور اتحاد العاصمة الجزائري فتيران المسيرة الخضراء فماتش اولمبيك اسفي عند لجنة الانضباط التابعة للاتحاد الافريقي لكرة القدم.

وكشفت مصادر مطلعة، ان لجنة الانضباط بالاتحاد الافريقي غادي تدير اجتماع غدا الخميس باش تشوف ملف احداث شغب الماتش، وهي الاحداث اللي بدات ملي نزلو جمهور اتحاد العاصمة للتيران وبداو كايشيرو على جمهور اسفي وعلى المصورين الصحافيين، وهذا الشي استفز شي مشجعين د اولمبيك اسفي اللي حتى هما هبطو لهم، قبل ما يتدخل الامن.

ومن المتوقع تصدر عقوبات على اتحاد العاصمة الجزائري بسبب هاد احداث الشغب اللي تسببت فيها الجماهير ديالو، ويقدر يتحرم من الجمهور فماتش الفينال ضد الزمالك المصري.