كود احمد الطيب الرباط ///

وزير كان صگع ما عندو زهر البارح فحفل اطلاق “أشغال إنجاز مصنع ببنسليمان لتصنيع اللقاح المضاد لكوفيد-19 ولقاحات أخرى”. هاد الوزير هو رياض مزور وزير الصناعة والتجارة اللي تصبغ بالاستقلال فهاد الحكومة.

علاش صگع؟ حقاش جاتو كورونا فبدية السيمانا وتسبب فتأجيل هاد النشاط الملكي كولو ومن بعد دار البي سي ار” كيف كيكون ديما باش كيكون نشاط ملكي٬ وبقى هو “نيگاتيف” وجابو فبلاصتو توفيق مشرف الكاتب العام المعين اخيرا فهاد الوزارة بعد سنوات قضاها فمديرية التواصل.

هاد مزور فلت حدث كبير كيهم وزارتو وكيهم بديتو فالحكومة. زهر عوج وصافي. البارح باش توقعات “اتفاقية الاستثمار لإنجاز وحدة تصنيع اللقاحات المضادة لكوفيد-19 ولقاحات أخرى، ببنسليمان” كانت وزارتو من بين الموقعين. فاللخر مشرف هو اللي سينا باسم الوزارة

الاتفاقية وقعاها بالاضافة الي الكاتب العام لوزارة الصناعة والتجارة كلا من نادية فتاح العلوي وزيرة الاقتصاد والمالية، ونزار بركة وزير التجهيز والماء، وخالد آيت الطالب وزير الصحة والحماية الاجتماعية، ويونس سكوري وزير الإدماج الاقتصادي والمقاولة الصغرى والتشغيل والكفاءات، ومحسن الجزولي الوزير المنتدب المكلف بالاستثمار والالتقائية وتقييم السياسات العمومية عثمان بنجلون رئيس شركة “سينسيو فارماتيك”، وسعيد أحميدوش والي جهة الدار البيضاء-سطات، وسمير اليازيدي عامل إقليم بنسليمان، وعبد الله كبيري مدير قطب الصناعة بالمكتب الوطني للكهرباء والماء الصالح للشرب.