كود -وكالات//

منعات نگليز دخول مغني الراب الأمريكي Kanye West لأراضيها، وهاد الشي خلا منظمي مهرجان Wireless Festival يعلنو إلغاء الدورة ديال 2026 كاملة، المهرجان كان مبرمج يتدار فـ لندن ما بين 10 و12 يوليوز، وكان “Kanye” من أبرز النجوم اللي غادي يحييوه، ولكن قرار وزارة الداخلية جا مباشرة من بعد الصداع  اللي كان بسباب تصريحات سابقة لي كيقول : “أنا نازي”، و“كنحب هتلر”، و“أنا عنصري”، وحتى “عمري نعتذر على تعليقاتي على اليهود”،عاد مني خرج أغنية “Hail Hitler”، وباع تيشورتات فيم رموز النازية، المنظمين واعدو باش يرجعو الفلوس للناس اللي شراو تيكيتات.

هاد التصريحات والتصرفات دارت الروينة فالشهور اللي فاتت وخلاّت ضغط كبير على الجهات الرسمية فبريطانيا، وخا أنه من بعد خرج واعتذر وقال بلي “ساليت مع معاداة السامية” و“كنبغي جميع الناس”، وحتى عبّر على الرغبة ديالو ففتح حوار مع الجالية اليهودية، وخا هكاك  هاد التراجع ما كانش كافي باش يبدل القرار ،السلطات شافت بلي حضورو ماشي فـ “المصلحة العامة”.