گود سبور//

وصلت الشوهة اللي داروها شي هرگاوا محسوبين على جمهور الجيش الملكي فـ الماتش ضد الاهلي المصري، البارح الجمعة ضمن دوري ابطال افريقيا، للعالمية وقنوات أوروبية معروفة صابحين كايهضرو عليها.

شبكة قنوات RMC الفرنسية، هضرت على الشغب اللي وقع فـ ماتش الجيش الملكي والأهلي المصري، وقالت انه تم استهداف لاعب (تريزيگي ديال الاهلي) بألة حادة فـ تيران سيستضيف كأس افريقيا بعد أقل من 3 السيمانات، وان الماتش بين الفريقين تحول لكارثة.

وقالت القناة الفرنسية المعروفة، ان الحكم ملي قرر إلغاء هدف لفريق الجيش الملكي، تشيرو مقذوفات (قراعي وغيرها) للگازون د تيران مولاي الحسن بالرباط، وواحدة من هاد المقذوفات وهي اداة معدنية حادة ديال البني تصاب بها تريزيگي.

هاد هرگاوا المحسوبين على جمهور ليفار، وبهاد السلوك ديالهم الهرگاوي راه ماشي غير تسببو فـ مشكل لفريق الجيش الملكي ممثل الكورة المغرب فـ دوري ابطال افريقيا اللي مهدد دابا بالعقوبة، ولكن راه تسببو فـ إساءة لصورة المغرب، والعالم كايتفرج فـ هاد الشوهة، والبلاد غادي تنظم بعد 3 السيمانات كاس افريقيا، وهنا السؤال اللي كايتطرح فين هي مسؤولية الأسرة والمدرسة فـ التربية؟ وعلاش بنادم كايمشي لبلاصة ديال الترفيه بحالا غادي للحرب واخا توفرت له ملاعب بمستوى عالمي باش يكون مرتاح؟