گود سبور//

وفرت السلطات النقل لجمهور اتحاد العاصمة الجزائري اللي جا للمغرب باش يشجع الفريق ديالو اليوم الاحد ضد أولمبيك آسفي فروتور دومي فينال كاس الكونفيدرالية الإفريقية.

وجاو الكيران هزو جمهور اتحاد العاصمة من حدا ستاد دونور فكازا باش يديوهم لآسفي بتأمين من السلطات، والجمهور ديال الفريق الجزائري غادي يلقاو التذاكر موجودين فباب تيران المسيرة الخضرا ملي يوصلو فابور، خاصهم غير يدليو بالباسبور الجزائري باش ياخدو التيكي.

وهنا كايبان الفرق ما بين دولة مغربية عندها مؤسسات وكاتحترم راسها وكاترحب بالعالم سوا فماتشات الكورة ولا غيرها من الأحداث والتظاهرات، وما بين بلاد حاكمينها كابرانات وكاتمنع جماهير الأندية المغربية يدخلو للجزائر يشجعو فراقيهم وما كاتعطيهمش الفيزا.