گود سبور//

كايعيش الوداد الرياضي، وضع استثنائي كايطبع عليه عدم الاستقرار، بسبب التسيير الفاشل والكارثي ديال الرئيس هشام ايت منة والمكتب المديري ديالو، واللي قلو فبلاغ رسمي انهم غادي يقدمو استقالاتهم.

مصادر ودادية، كشفت لجورنال “گود” أن الوضع فالوداد الرياضي حاليا مفتوح على مجموعة من السيناريوهات، من بينها تشكيلة لجنة تصريف الأعمال مكونة من مسيرين سابقين بالنادي وعارفين مزيان البيت الودادي، باش يتكلفو بتدبير المرحلة المقبلة بينما تم انتخاب رئيس جديد للنادي فجمع عام غير عادي.

وحسب نفس المصادر، فهاد المرة كاين إجماع داخل النادي على عدم الوقوع فالغلط اللي طاحو فيه الوداديين مع أيت منة، ملي طلعوه رئيس للوداد وهو براني على الحمرا وعمرو ما كان لا ودادي ولا عندو ارتباط بالوداد من غير مصلاحتو الشخصية، والوداديين باغيين دابا رئيس يكون ودادي وكايبغي الوداد وعندو ارتباط بها وكايعرف مزيان النادي، ومن بين الأسماء اللي مطروحة باش تشد رئاسة الواك خلال المرحلة المقبلة، كاين الرئيس الأسبق عبد الإله أكرم اللي الاسم ديالو مرشح بقوة باش يرجع للنادي فمرحلة جديدة.

وبالرجوع لايت منة والمكتب ديالو، فالمصادر الودادية وضحت أن برلمان النادي ما غاديش يتزاگلو معهم وغادي يتحاسبو معهم بالقانون على المرحلة اللي دوزوها فالوداد، وغادي يبقاو متبعين الافتحاص المالي للنادي اللي دفعوه للمحكمة حتى يخرج، ويعرفو كل ريال من فلوس الوداد فاش صرفو آيت منة والمكتب ديالو، خصوصا وأنه جاب بزاف ديال اللاعبين فهاد العامين اللي ترأس فيهم النادي بفلوس كثيرة، وبلا ما يعطيو المستوى المطلوب منهم، وإلى بغا النادي يتفارق معهم خاصو يخلص لهم شروط فسخ العقد ولا يمشيو للنزاعات، وهذا الشي غادي يزيد يغرق الوداد فوضع مالي صعب.