وكالات//

وقعات واقعة حزينة فمدينة مينغاشيفير فـ أذربيجان، بعدما ماتت واحد البنت سميتها ليامان ممدلي عندها 19 عام، غير نهار واحد من بعد عرسها بـ إلنور ممدلي اللي عندو 33 عام.

حسب التقارير، راجلها وعائلتو بداو كينتاقدوها بزاف على فستان العرس ديالها حيت كان عارِي شوية من الفوق (مكشوف الكتاف)، وقالو عليها باللي “بانت عريانة” فالحفلة. هاد الكلام والانتقادات دارو ليها ضغط نفسي كبير حتى انهارت.

باها، مراد بايراموف، قال باللي المشكل بدا من نهار العرس، وهاد الضغوطات هي اللي كانت السبب فالموت ديال بنتو. وضّح أن العريس وعائلتو جاو للدار ودارو صداع وقالو ليه وللمرا ديالو: «حشومة عليكم! كيفاش خليتو بنتكم تلبس فستان بحال هكا؟”.

قال باها: “فسّرنا ليهم باللي راه فستان عادي ديال العرس، ولكن ما بغاوش يسمعو. بنتي ما قدراتش تتحمل وانتحرات.”

وبعد هاد الشي، باها طرد العريس من الدار ملي جا يبغي يحضر للجنازة ديالها. ودابا السلطات الأذربيجانية دايرا تحقيق فالقضية بناءً على الشكاية ديال الأب.

الناس فـ أذربيجان بدّاو كيهضرو بزاف على هاد الموضوع، خصوصاً على التوازن بين العادات والتقاليد من جهة، والحرية الشخصية من جهة أخرى، خصوصاً فمناسبات بحال العرس اللي خاصها تكون فرحة ماشي مصدر ضغط.