كود ـ وكالات//

العالم كامل ولى كيهضر على ’’الخطر اللي كيشكّلو الذكاء الاصطناعي على الخدمة‘‘، خصوصا مع السرعة اللي كيتطور بيها. كاين اللي كيشوف فيه فرصة باش يزيد الإنتاجية ويخلق طرق جديدة فالعمل، وكاين اللي خايف منو حيث ممكن يعوّض البشر فعدد من المهن، خاصة اللي كتعتمد على التفكير والإبداع والتواصل المباشر.

وحسب وكالات الأخبار فالخبير “روبرت فيلبس” عطا لائحة ديال المهن اللي مازال بعيدة شوية على خطر الاستبدال، وقال بللي “المهن اللي كتطلب تعاطف وتفاعل إنساني” بحال الأطباء النفسيين، والمستشارين، ما يمكنش الروبوتات تعوّضها، حيث الثقة والعلاقة الإنسانية ما تتصاوبش بالذكاء الاصطناعي.

وزاد فيلبس باللي حتى “عمال الطوارئ” بحال المسعفين ورجال المطافئ، خدامين فظروف صعيبة ومفاجئة، وهذ الشي كيديرهم بعيدين على الأتمتة. وحتى فالمجالات الإبداعية بحال الكتابة، التصميم، والموسيقى، ممكن الذكاء الاصطناعي يخلق محتوى، ولكن “الإبداع الحقيقي” باقي خاصّو الإنسان.

وأكد الخبير أن الذكاء الاصطناعي “يقدر يدير المهام الروتينية فقط”، وهاد الشي كيعني أن الناس خاصهم يركّزو أكثر على مهارات الإبداع، التفكير النقدي، التواصل، والأخلاق، حيث هادو هما اللي غادي يزيدو قيمتهم فالمستقبل.

لكن الدراسة ديال “OpenAI” بينات أن بزاف ديال المهن معرضة للخطر، وحددت “44 وظيفة” اللي الذكاء الاصطناعي يقدر يعوّضها بسهولة. وجا ترتيبها بالنسب التالية:

* موظفو الكاونتر والإيجارات: %‎81

* مدراء المبيعات: 79%

* موظفو الشحن والاستلام: 76%

* المحررون: 75%

* مطورو البرمجيات والمحققون الخاصون: 70%

* مسؤولو الامتثال والمشرفون على المبيعات: 69%

* ممثلو المبيعات الصناعية والعامة: 68%

* مدراء العمليات والخدمات الطبية: 65%

* المستشارون الماليون ووكلاء الشراء: 64%

* ممثلو خدمة الزبناء والمشرفون على الإنتاج: 58%

* الممرضون المتخصصون ووكلاء العقار: 54 %

* الصحافيون والمحللون ومدراء النظم: 52 %

* المحامون: 46%

* العاملون الاجتماعيون والمساعدون الإداريون: 42%‎

* الممرضون والمنتجون والفنيون: 30%  تقريبا

* الصيادلة والمحاسبون والمهندسون الميكانيكيون: بين ‎20 و30%

هاد الأرقام كيبينّو أن الذكاء الاصطناعي “غادي يبدّل شكل سوق الشغل”، خصوصا فالخدمات اللي فيها تكرار وروتين. لكن المهن اللي فيها “تعامل إنساني وإبداع وفكر” باقيّة فالأمان، على الأقل دابا.

يعني، فالوقت اللي الروبوتات غادي تولي تدير بزاف ديال المهام، “الإنسان باقي مميّز بالقلب والعقل والإحساس”… وهاذ الشي اللي الذكاء الاصطناعي مازال ما عرفش يقلّدو.