كود ـ كازا//

تزامن الاعتراف تاع نتنياهو، الوزير الأول الإسرائيلي، بمغربية الصحراء، مع تأسيس جمعية من قبل يهود مغاربة، سماوها ميمونة للأعمال الخيرية، وداروا ليها أهداف من بينها تعزيز التعاون بين مكونات الشعبين المغربي والإسرائيلي، ودعم الأنشطة المنظمة من قبل الجالية المغربية المنحدرة من إسرائيل، وتخليد ذرى دمجموعة من الأولياء اليهود المدفونين بالمغرب، والتعريف بالقواسم المشتركة بين الثقافة الإسرائيلية والمغربية، وتنظيم أنشطة لذوي الاحتياجات الخاصة وتأطير الأنشطة الاجتماعية وغيرها من الأنشطة الكثيرة اللي احضتنها القانون الأساسي.

ومن أهداف الجمعية أيضا، تعزيز وتقوية العلاقات بين المغرب وإسرائيل، والدفاع عن الوحدة الترابية في المحافل الدولية والتصدي لمناورات خصوم الوحدة الترابية

وجمعات الجمعية بين التادلي شلوم وموشي أصراف المولود في تل أبيب، ومناحيم وشي مغاربة آخرين، والمهم من هادشي كلو، تم رصد غلاف مالي قدره 7 ملايير،  لتغطية مجموعة من الأنشطة اللي معولين يديروها باش يكون عند الجمعية إشعاع وطني ودولي.

وعلمت “كود” بلي أعضاء جمعية ميمونة للأعمال الخيرية، غادين يكونوا حاضرين في مهرجان سيدي الغليمي، نهار لاربعا الجايا، في سطات، وغاديين يتلاقاو مع أعضاء جمعية مساندة مرضى السكري، اللي تتساهم في دعم آلاف المرضى بالإقليم.

وختاروا باش تكون سطات هي الخرجة الأولى لجمعية ميمونة، حيث فيها جوج  دالمزارات ديال اليهود.

دابا هاد الجمعية غادي تنشط في مجموعة من المدن، وفي قطاعات متعددة، وبغلاف مالي مهم، وهادي هي الخاوة تاع بصح ماشي شي وحدين من هوك، غير تيحفرو لينا، وتيقول لك خاوة خاوة. وهادي هيا الخاوة الميمونة ولا فلا.

جمعية ميمونة