گود كازا//

عرفت جلسة اليوم الخميس من محاكمة ما يعرف بملف “إسكوبار الصحرا”، المتابع فيها كل من سعيد الناصيري الرئيس الأسبق للوداد الرياضي والقيادي السابق بحزب الأصالة والمعاصرة وعبد النبي بعيوي القيادي السابق بنفس الحزب والرئيس السابق لجهة الشرق حضور محامين الحاج أحمد اللي منصب راسو طرف مدني فـ القضية.

وفـ تصريح لها قالت المحامية حنان العلام عن دفاع أحمد بنبراهيم او “المالي” كيف كيتلقب: “اليوم تقدما بتسجيل النيابة ديالنا فـ الملف عن الحاج أحمد بنبراهيم، كمطالب بالحق المدني فـ هاد الملف، والموكل ديالنا هو ضحية وتعرض للنصب فـ هاد الملف”.

ووضح عصام السمري اللي حتى هو محامي ديال بنبراهيم، فـ تصريح له، وقال: “الحاج المالي سمعت له الفرقة الوطنية وأنجز محضر المواجهة، وتم الاستماع إليه من طرف قاضي التحقيق، والحاج أحمد بنبراهيم لا يرفض الحضور أمام المحكمة، ولكن هو معتقل يقضي عقوبة حبسية، وأي تصريح أدلى به أمام الشرطة القضائية مازال كايأكدو عبر دفاعه من خلال مطالبه المدنية”.

وكمل المحامي ديال المالي وقال: “الموكل ديالي هو مطالب بالحق المدني ويقضي عقوبة حبسية مدتها 10 سنين، وهو موضوع الآن بالسجن المحلي ديال سلا، كان تحكم فـ هاداك الملف ديال 40 طن دالحشيش اللي تحجزات فـ الجديدة، وصدر حكم ف حقو بـ 10 سنين، وهاد المدة فتهمة الاتجار فـ المخدرات راه هي السقف، وهذا حق الدولة ثبتت عليه الجريمة خدا العقوبة، ولكن هاد العقوبة او الحكم الصادر عليه بـ10 سنوات، ما كايمنعش أنه إلى تعرض للتزوير او النصب يطالب بحقو أمام المحكمة، وهادي هي الوضعية ديالو فـ هاد الملف كمطالب بالحق المدني ومبلغ”.

وبخصوص الجنسية ديال الحاج أحمد بنبراهيم أو إسكوبار الصحرا كما يلقب، وضح المحامي وقال: “الجنسية اللي كانعرف أنا هو أنه عندو جنسية مالية، يتقن العربية والفرنسية، هو كايراسل الدفاع ديالو بهاد اللقب (إسكوبار الصحرا)، ولقب ماشي كاينفيه هو ولا كاينكرو ولكن لقب تمنحو وبعدما كان خداه ملي كان فـ موريتانيا، واللي دوب فيها 4 سنين وصدر حكم بالبراءة ديالو من الاتجار فـ المخدرات، والملف ديالو فـ موريتانيا كان خلف زوبعة تما وبسبابو تم إعفاء المدعي العام، وماشي أي حاجة كاتقال على هذا الشخص (المالي) راه صحيحة راه تم تضخيم هذا الشي، الحاج هو رجل بسيط، إيه فعلا امتهن التجارة فـ المخدرات ولكن راه ماشي بوحدو، راه المغرب، ما غاديش يجي واحد من مالي وغادي يسيطر على سوق المخدرات، راه 40 طن اللي تشدات، والمسطرة فيها 21 طن راه ماشي ديالو بوحدو، راه فيها 2 ديال فلان و 2 ديال فلان و 2 ديال فلان و 4 ديال فلان “.

https://www.facebook.com/share/v/1AqsgUp5YR/?mibextid=wwXIfr