الرباط كود سبور//

خرج المهدي الجابري مدرب فريق يعقوب المنصور اللي الرئيس ديالو هو المهدي بنسعيد وزير الشباب والثقافة والتواصل، والممارس بالقسم الوطني الثاني، (خرج) بتصريح خطير بعد الماتش ديالهم ضد الاتحاد الإسلامي الوجدي، كايوجه فيه اتهامات خطيرة ويدعي أن شي أطراف ما باغينهمش يطلعو للقسم الأول، وهنا أي متتبع غايطرح سؤال شكون كايقصد هذا المدرب واش الجامعة الملكية المغربية لكرة القدم ولا العصبة الوطنية لكرة القدم الاحترافية.

وقال المهدي الجابري مدرب فريق يعقوب المنصور لوسائل الإعلام من ورا الماتش ديالهم ضد الاتحاد الإسلامي الوجدي: “والله ما بغينا نطلعو، أقسم بالله ما بغينا نطلعو، وشرح الواضحات من المفضيحات، اليوم كارثة بكل ما تحمله الكلمة من معنى، يعني مجزرة تحكيمية وأنتم شاهدتم المباراة وإلى كنت أنا على خطأ قولو ليا انت على خطأ”.

وكمل مدرب فريق الوزير المهدي بنسعيد: “عيب وعار، عيب وعار، وكاتبان النية كاتبان، 5 دقائق حشومة 5 دقائق وشفتو بلي المقابلة توقفت لمدة طويلة وشهر مجموعة من البطائق ودخل الإسعاف وتغيير اللاعبين وفي الأخير يضيف 5 دقائق، إلى حيدنا 3 الدقايق ديال التغييرات واش 2 دقايق هي اللي توقفت فيها المباراة، بالله عليكم هل هكذا سنسير بكرة القدم نحو الأمام، بالله عليكم”.

وزاد المدرب المذكور وقال: “بالنسبة للمباراة، أظن أنها مباراة كانت جيدة، فريق الاتحاد الإسلامي الوجدي كايعرف أننا فريق كايلعب على الهجمة المنظمة، ضغط علينا فالمناطق ديالنا ولكن بالرغم من ذلك ما خرجناش من الملعب ديالنا وحاولنا نخرجو من مناطق الخصم وخلقنا فرص فالشوط الأول ما قدرناش نماركيوها بدليل أننا فالشوط الثاني لقينا بالثقل ديالنا على مرمى الخصم ولكن الحكم غير مسار ومجرى المباراة حتى في آخر الدقائق كانت ضربة جزاء واضحة”.

بنسعيد باغي الفرقة غير باش يبان سياسيا وانتخابيا ودعموه واليوم بدا يهدر على المؤامرة وهو أصلا من حزب معروف كيفاش تخلق. شفتو فين وصلنا.