كود ـ القاهرة- مصر//
كتعيش العاصمة المصرية القاهرة، على أجواء ماتش ذهاب فينال عصبة أبطال إفريقيا بين الوداد الرياضي والأهلي المصري، واللي غيتلعب الأحد المقبل فتيران القاهرة الدولي.
فالقاهرة كلشي كيتكلم على الفينال بين الواك والأهلي، سوا من الجماهير المصرية أو من المغاربة المقيمين فمصر أو الجماهير الودادية اللي بدات كديبلاصة باش تحضر المواجهة وتشجع الحمرا.
وبالنسبة لفريق الوداد الرياضي، فبعد وصول البعثة البارح للقاهرة انتقلو اللاعبين والطاقم التقني ديال الوداد الرياضي لواحد الفندق بعيد على وسط القاهرة، وهادي خطوة مدروسة من إدارة النادي برئاسة سعيد الناصيري باش الفريق يبقى طرونكيل ومرتاح وبعيد على أي تبرزيط يقدر يشوش عليه، لضمان تركيز اللاعبين والمدرب زفين فاندنبروك غير على الماتش.
وبخصوص الطقس ودرجة الحرارة بالعاصمة المصرية القاهرة اليوم الخميس وهو أول أيام “غزاة إفريقيا بقاهرة المعز”، فدرجة الحرارة طالعة وكاين الصهد وكتوصل ما بين 35 و 36 درجة مئاوية، خاصك ضروري تبقى فشي مكان مكيف باش تكون مرتاح وحتى الرطوبة مرتفعة وكاين الضبابة ومن المنتظر تصب الشتا خلال الساعات المقبلة حسب التوقعات ديال الجو.
