كود – وكالات//

فمدينة يوكوهاما فجاپون تحل واحد البار تقدر ضرب فيه طاسة وفنفس الوقت ضبر فيه على خدمة او لا تبدلها ، البار كيعطي استشارة مهنية ديال 90 دقيقة، ومعاها كْويسات مع القطعة ومن فوق هادشي كلشي فابور .

الفكرة جابها شاب اسميتو شوتا أوميموتو، اللي بغا يعاون الناس باش يلقاو فرص خدمة جديدة بطريقة مريحة وبعيدة على صداع ديال شركات الوساطة وحط cv  حتى نعيطو ليك ، الكونصيبط ديال هاد البار هو ان  الشركات هي اللي كتمولو و كتخلص للبار 6500 دولار على كل واحد كيلقى خدمة من هاد البار، أما الكليان ما كيخلص حتى ريال.

فالكونطوار مطالقينش الراي ولا أحوزار ولكن كتهضر على المستقبل المهني ومشالكك فالخدمة وعلاش بغيتي تبدلها، وفنفس الوقت البار مان  كيجبد طابليط وكيبدا يقلب معاك على فرص الخدمة لي مناسبة ، وسط جو مريح كيعاونك تختار بلا رسميات .

كاين اللي شاف الفكرة فيها مشكل أخلاقي، حيث كيشوفو أن لالكول ممكن يأثر على القرارات ديال الناس، لي يقدرو يرجعو فيها بعدما يسحاو، وخا هاد الانتقادات كاين اختيار ديال طاسة بلا لالكول لي خاف على راسو يفوْت، الهدف فالأخير حسب مول المشروع، هو يخلق فضاء كيخلي الناس يهضرو بصراحة على الخدمة والحياة ديالهم بلا ضغط ومشاكل وخا ميلقاوهاش غير يخويو ويفرغو.