أميمة عطية – كود كازا ///

علنات الشركة الوطنية للطرق السيارة بالمغرب، ان شبكة لوطوروت غادي تعرف زخام بمناسبة عيد الأضحى، خاصة يومي الاثنين والثلاثاء 25 و26 ماي الجاري، ما بين الثالثة دالعشية والعاشرة ليلاً، وكذا نهار الأحد 31 ماي، اللي كيتزامن مع فترة الرجوع، ما بين الرابعة دالعشية والعاشرة ليلاً.

وحسب بلاغ توصلات به “كود”، دعات الشركة مستعملي الطريق السيار لتنظيم تنقلاتهم قبل السفر، والاطلاع على حالة السير الآنية عبر تطبيق “ADMTRAFIC”، مع التأكد من الرصيد المتبقي فـ”الباس جواز” وتعبئته قبل ميدخلو لوطوروت، خاصة عبر التطبيق الجديد “جواز”، اللي تزاد لباقي القنوات الرقمية والمادية المتوفرة.

وزاد ضاف البلاغ أن خدمة “جواز” ولات متوفرة حتا للبيع والتعبئة داخل لمحلات لكينين فمحطات الاستراحة، باش تسهل العملية على مستعملي الطريق السيار خلال فترة العيد.

ووصات الشركة لي كيسوكو بالاطلاع على الحالة الجوية، مع ضرورة والحذر فحالة الرياح القوية أو الأمطار أو الضباب، وارتاحو شويا فطريق بعد كل ساعتين من سوكان ، مع مراقبة حالة ديال روايد والحالة الميكانيكية لطنوبيل ، وعدم استعمال ممر الطوارئ إلا فالضرورة القصوى.

وأكدت الشركة أنها، وعلى غرار الفترات الاستثنائية، فعلات “نظام اليقظة الشاملة”، اللي كيرتكز على تعزيز فرق مراقبة حركة السير وفرق المساعدة، والصيانة الاستباقية للتجهيزات والبنية التحتية، إضافة إلى تعزيز التواصل مع مستعملي الطريق السيار والتنسيق مع مختلف المتدخلين، بهدف ضمان سفر آمن ومريح خلال عطلة عيد الأضحى.

وختم البلاغ بدعوة لمهتمين لي باغين لمعلومات كتر اعيطو بالرقم 5050 أو ازورو المواقع الإلكترونية الخاصة بالشركة وحركة السير وخدمة “جواز”.