كود سبور//

أكد عادل هالا نائب رئيس الرجاء الرياضي محمد بودريقة، أن الأخير كاين فالمملكة المتحدة اللي دار فيها عملية جراحية على القلب، وأنه فتواصل دائم مع المكتب المديري والنادي للمساهمة فالتسيير ديالو في انتظار تسالي فترة النقاهة ويرجع للمغرب.

وهضر عادل هالا النائب الأول لرئيس الرجاء الرياضي فمور على “راديو مارس”، وقال: “بودريقة كاين فالمملكة المتحدة وكنتمناو له الشفاء، وهو دابا كيمر من مرحلة نقاهة والأمور عادية فالغياب ديالو وهو فتواصل مستمر مع أعضاء المكتب المديري وكيتدخل بشكل يومي فجميع الأشياء التدبيرية، وفتواصل مع اللاعبين والطاقم التقني والمسؤول على الفريق الأول والمسؤول على المالية ومدير النادي ومدير الأكاديمة والأشياء كتمشي بطريقة اعتيادية وما كاينش شي تأثر”.

وزاد وضح عادل هالا وقال: “بصراحة الرئيس يتواجد بالمملكة المتحدة فين دار 2 عمليات جراحية وبخصوص العودة ما كيمكنش نعطي تاريخ محدد وهذا الأمر يخص الحالة الصحية ديالو والمعطيات الخاصة للفرد ومنها المعطيات الصحية والقانون كيحمي هاد المعطيات وأنا واخا نائب للرئيس فماشي من حقي نطلب من الرئيس يعطيني تفاصيل الحالة الصحية ديالو كيفما تم تشخيصها من طرف الأطباء ديالو او يعطيني تفاصيل مرحلة النقاهة، هو دابا فمرحلة نقاهة ويتماثل للشفاء وهادي مسألة عادية بالنسبة لشخص داير عملية على شرايين القلب، وهاد المسألة تقدر تاخذ ما بين شهر إلى 3 أشهر وشي حاجة عادية وهو كيتماثل للشفاء.. كنفكرو نديرو له زيارة ولكن خاصنا نحترمو حرمة المريض حيث كاين اللي ما كيبغيش شي حد يزورو وهو مريض، هاد الفكرة كاينة وممكن يمشيو شي أعضاء من المكتب يشوفوه”.