كود سبور//

قال عادل هالا رئيس الرجاء الرياضي، اللي گاع الرجاويين كايطالبوه بالرحيل عن النادي، (قال) انه هو والمكتب المديري ديالو ما بقاتش عندهم رغبة للباق فالمناصب ديالهم، واللي مخليهم مازال باقيين هي المسؤوليات اللي عليهم هي اللي مخلياهم مازال ما قدموش استقالاتهم.

وخلال حوار له على راديو 2M، قال عادل هالا: “حنا كمكتب مديري قررنا تهيئة النادي لمرحلة انتقالية، بمعنى حنا غادي نمشيو، والظروف ديال العمل غير مواتية للعديد من الأسباب وحنا مقتنعين بأنه ما يمكنش لنا نمشيو ضد التيار، وباش نكونو واضحين الرغبة ما بقاتش حيث ظروف الاشتغال ظروف قاهرة جدا جدا، باش تنجح خاص تكون عندك ظروف العمل وحنا ظروف العمل ما كيناش”.

وكمل عادل هالا وقال: “اعلاش حنا متأخرين فالرحيل ديالنا؟ حيث المسؤولية ديالنا ما يمكنش لنا نخرجو دابا فمرحلة حساسة كاندبرو فيها ملفات عندها آجال زمنية مرتبطة بهذا المكتب، ما يمكنش توقف مفاوضات رفع المنع او مفاوضات جلب موارد مالية باش تخلص اللاعبين الحاليين وتنتصر لنفسك وتحط السوارت وتخلي الامور للمجهول”.