“كود” – بني ملال//

”فرقة نقولو Action “ للسينما والمسرح غادي تقدّم للجمهور العرض الجديد “هاربات” نهار الثلاث 09 دجنبر 2025 فالمركز الثقافي بني ملال مع السبعة ديال العشية، العرض غادي يجي برسالة قوية وغادي يسلّط الضو على العالم المخبي ديال البنات لي كيحاولو يهربو من ضيق الحياة باش يقلبو على فرصة جديدة، قبل ما يلقاو الطرق مسدودة قدّامهم.

القصة كتبدا فواحد الفضاء مظلم، فين كانو البنات محصورين بين الخوف ولوهم حتى خرجات شخصية لي بانت فلول بحال محامية ديالهم، كتفهم القوانين وكتبان كتعاون، ولكن مع الوقت بان الوجه لاخر ديالها: كتخوّفهم من الهروب وكتوهمهم بأن الموت هو المصير، وهاد الشي خلاهم يشكو فالنوايا ديالها.

الصراع الدرامي كيبان من خلال ثلاثة شخصيات قوية: سعيدة لي كان الخوف مسيطر عليها، و”أمال“ لي دخلات بحلم كبير واصطدمات بالواقع اللي تهدّم قدّامها، وعائشة لي كانت كتجي بحال شي جن كتعاود على الانتحار ديالها، وهاد الحضور ديالها زاد العمل دراما وعمق، ليكليراج، الموسيقى والديكور تخدمو بطريقة باش يعكسو الستريس والاختناق اللي عاشتو الشخصيات فوق الخشبة.

“هاربات” رسالة فنية مباشرة، كتحاول تواجه الاستغلال اللي كيتعرضو ليه بزاف ديال البنات مني كيبغيو يهربو او يهاجرو، العرض غادي يحط الجمهور قدّام سؤال كبير: واش الحلم ديال التحرر يستاهل المغامرة والهروب ولالا؟