وكالات//

تبلغو باختفاء راجل كان متّهم من قبل بأنه كيطارد نجمة البوب تايلور سويفت، بالرغم من المجهودات الكبيرة اللي دارتها محققة خاصة جابتها سويفت باش تعرف فين كاين.

ووفقاً لجريدة “ميرور” البريطانية، صدر أمر تقييدي مؤقت فحق الراجل اللي سميتو بريان جيسون واغنر، عندو 45 عام وكيسكن فولاية كولورادو، فشهر يونيو 2025، بسباب تهديدات مزعومة وادعاءات غريبة، منها أنه كيدّعي بلي هو الأب ديال ولدها.

وتزادت المدة ديال هاد الأمر التقييدي حتى 22 شتنبر، من بعد ما اختفى واغنر بشكل كامل. وعلى حسب ما قالت المحققة الخاصة بروك بيرغ، راه واغنر ما جاوبش على بزاف ديال المحاولات باش يتاصل بيه سواء فالمكالمات ولا فالميساجات، وما كاين حتى عنوان يمكن يسيفطو ليه الوثائق القانونية. وقالت بيرغ فوثائق المحكمة: “المدعى عليه يا إما بلا ماوى، يا إما كيتخبى عامدًا”.

وثائق المحكمة بيّنت أن السلوك ديال واغنر كان كيخلّع، بحال أنه بدّل العنوان ديالو فإدارة السيارات (DMV) وحطّ عنوان دار تايلور سويفت فـ لوس أنجلوس، وحاول حتى يحوّل البريد ديالها لسمّيتو، وزاد عليها وظهر ثلاث مرات قدّام دارها فـ يوليوز 2024، وفي وحدة منهم كان شادّ قنينة فـ يدو.

سويفت والفريق ديالها جمعو أكثر من 100 صفحة من الأدلة، أغلبها رسائل كيتقال أن واغنر صيفطها لحسابات المعجبين ديالها. وفـ مكالمة مع بيرغ فشهر غشت، واغنر نكر أي علاقة عندو مع القضايا القانونية ورفض يقول فين ساكن، وقال أنه “كان خاصو يعيش فدار تايلور ويخدم معاها”، وزاد وقال إن الأمر التقييدي “خرّب ليه حياتو”، وسالا المكالمة بجملة كتخلّع قال فيها: “خاصني ندير شي حاجة معاها”.

وفي وثائق المحكمة، واحد المصدر اللي تسجّل تحت الاسم المستعار “جين دو”، قال أن واغنر كيبدّل النميرو ديال تليفونو باستمرار وكيستعمل تطبيقات بحال  TextNow، وهاتشي كيصعّب بزاف عملية التتبع ديالو.

والمصادر اللي قريبة من تايلور سويفت قالو إن هاد الوضع ولا كيأثر بزاف على حياتها الشخصية والمهنية، وصرّح واحد منهم: “هاد القضية ولات من الأولويات ديالها، حتى يتم التعامل معاها بشكل نهائي من طرف القضاء والسلطات”.