كود سبور- الرباط//

تكرر تاني سيناريو غياب الجمهور فماتشات أندية الرباط، وهذه المرة تيران المدينة فالعاصمة كان شاهد على غياب الجماهير بين اتحاد التواركة والوداد الرياضي البارح الاحد ضمن الدورة 15 من البطولة، فصورة تسيء للكورة المغربية والمغرب المقبل على تنظيم أحداث كروية عالمية.

إدارة اتحاد التواركة قررت تطبيق قانون نسبة 5% على جمهور الفريق الزائر اللي هو جمهور الوداد الرياضي، وجمهور الفريق الأحمر وعلى راسهم گروب “وينرز” ما عجبهمش الحال واعتبرو هذا الشي ماشي منطقي بالنسبة لهم حيث عددهم كبير، وعلنو غيابهم على الماتش وطالبو إدارة النادي تنوض تدافع على الفريق والمصالح ديالو.

وبالمقابل كاتبقى قاعدة جمهور اتحاد التواركة صغيرة بزاف وما يمكنش، ومنطقة النادي الرباط فقرار تخصيص 5% كايشوفو انه غادي يدير شويا ديال التوازن امام الوداد الراضي اللي كايستمد نسبة كبيرة من قوتو من الجمهور ديالو.

إلى جينا نشوفو من زاوية الطرفين بجوج فكل واحد فيهم عندو الحق، ولكن المتفرج المحايد كايشوف ان التيران خاوي، والجمهور راه جزء من جمالية كرة القدم، وماتشات يتلعبو بلا جمهور فتيران زوين بحال ملعب المدينة اللي تعاود البناء ديالو، راه غادي يضر هذا الشي بصورة الكورة المغربية، خصوصا وان المغرب كاينظم تظاهرات كروية قارية وعالمية كبيرة، وعيب يغيب الجمهور المحلي على ماتشات البطولة الوطنية، الأمر اللي خاص معاه إعادة النظر فقانون 5% فالتيرانات الصغيرة بحال ديال الرباط اللي أنديتها عندها قاعدة صغيرة ديال الجمهور، مع ضمان حقوق هذه الفرق طبعا.