مصطفى العلوة -كود سطات//

شاعلة فمواقع التواصل الاجتماعي بعدما تسربات صور وفيديوهات من سبيطار الحسن الثاني فسطات كيبان فيهم كيفاش كتتوزع الماكلة على الأطر الصحية بطريقة مهينة، وسط ميكات بلا شروط السلامة الصحية، بحال إلى هوم فشي موسم ديال الصدقة ماشي فمؤسسة صحية كتسهر على صحة الناس.

الماكلة اللي توزعات، حسب شهادات بعض الأطباء والممرضين، ماشي غير هزيلة ودون المستوى من حيث النوعية ولكن راها غير صحية، كتشمل مواد غذائية مشكوك فيها، وفي بعض الحالات كتكون باردة ولا فاسدة، والأخطر من هاد الشي هو أن طريقة التوزيع كتحط من كرامة العاملين فالقطاع، اللي مفروض يكونو هما خط الدفاع الأول في الحفاظ على صحة وحياة المواطنين.

الناس اللي شافو الفيديوهات والصور تصدمو، وبدات الانتقادات كتطال إدارة المستشفى والمسؤولين الإقليميين على القطاع، اللي ما قدروش يضمنو حتى وجبة صحية محترمة لناس لي خدامين ليل ونهار وسط ضغط كبير ونقص فالموارد البشرية..