وكالات//

تعرّض مغني الراب شون “ديدي” كومبس لمحاولة طعن وهو فالسجن ديال “MDC”  فبروكلين، حسب ما قالو صحابو المقرّبين.

شارلوتشي فيني، اللي هو صديق ديدي من أكثر من 30 عام ومؤسس شركة Bad Boys للتسجيلات، قال باللي ديدي اللي عندو 55 عام فاق من النوم ولقى واحد داير السكين على عنقو.

وقال فيني لصحيفة ديلي ميل: “ما عرفت واش حاول يقاوم ولا الحراس هما اللي تدخلو، كل اللي عارف هو أن الحادث فعلاً وقع.”

وزاد وقال إن الهدف من الواقعة ما كانش القتل، ولكن غير باش يخوفوه، ووضح: “لو كان بغا يضربو بصح، راه القضية كانت تسالي فواحد الثانية. هاد الشي كان غير تحذير، ولكن مع شون هاد الطريقة ما غاديش تنجح.”

الفريق القانوني ديال ديدي قال إن التهديدات بالعنف تزادت عليه فالسجن خلال المحاكمة ديالو فالقضية ديال الاتجار بالجنس. المحامي ديالو، برايان ستيل، قال فالمحكمة إن واحد من الحباسة حاول يهددوه بموس ولا بزيزوار ديال حلاقة قبل ما الحراس يتدخلو. وأضاف أن الهدف من هاد الهجوم كان هو باش المجرم “يولي مشهور” من بعد ما يؤذي ديدي.

وديدي تعتاقل من شتنبر 2024 فبروكلين، وكيتحاكم بتهم ديال الاتجار بالجنس والابتزاز. وفوقت سابق من هاد الشهر، تحكم عليه بتهمتين ديال النقل لأغراض الدعارة، ولكن تبرّأ من تهم ديال التآمر على الابتزاز والاتجار بالجنس.