هناء ابو علي كود سبور كازا ///

فالوقت اللي فرق كرة القدم وصلات لتطور كبير وحنا فعام 2023، وبلاما نمشيو لأوروبا اللي هربانين فكرة، ونبقاو غير بإفريقيا اللي كاينين فيها منافسين أقوياء بحال صن داونز الجنوب إفريقي والأهلي المصري اللي كيعتامدو على أساليب جد متطورة باش ينافسو على الالقاب، ناض مسؤول بالوداد الرياضي باغي يعتمد على الدعاء باش الفريق يتأهل إلى فينال عصبة أبطال إفريقيا. هادي ثقافة مشرقية بدات فالكورة هادي سنوات قبل ما تعشش فعقول مسيرين مغاربة

محمد طلال أمين المال بنادي الوداد الرياضي خرج هذه المرة وكتب واحد تدوينة غريبة بصفحتو على الفايسبوك. طلب لمغاربة يدعيو مع النادي. هو مشى مع بعثة الواك بجنوب إفريقيا وكتب: “هنا بريتوريا .. تنتظرون منا الوفاء، ونسألكم نحن الدعاء”.

هاد الجملة اللي كتب محمد طلال المسؤول بالوداد الرياضي، راه فيها بلا ما يعيق زعزعة ثقة الوداديين بفرقتهم قبل مواجهة دومي فينال عصبة أبطال إفريقيا ضد صن داونز، كيفاش نادي عندو هاد الصطاف كامل والنجوم والإدارة يعطي الانطباع باللي النتيجة غادية تكون لصالح النادي الجنوب افريقي وباللي المعجزة تقدر تكون بالدعاء وصافي.

راه الوداد اللي رابحة العصبة الاخيرة وما داتهاش بالدعاء بل بالكورة. كون تبعنا الدعا كون ما ربحات حتى شي كاس.

اللعب والفرقة والتوجاد والخدمة ديال كلشي هي اللي كتعطي نادي كيربح وواحد كيخسر.

واش دابا هاد الأهلي اللي ضربوا الترجي أو هاد صن داونز الجنوب إفريقي اللي وصلوا لهذا النيفو، وصلوه بالدعوات والصلوات ؟! أيه كل واحد حر فراسو يأمن بلي بغى ولا ما يأمنش كاع سوقو هذاك، ولكن ملي ما يكونش متقلد شي مسؤولية بمنصب بشي نادي بحال محمد طلال لأن المسؤول راه ماشي بحال الجمهور وأي كلمة محسوبة عليه والدرو ديالو يوضح وينشر المعلومة الصحيحة، وحيث دابا مثلا فحالة خسرت الوداد وهذا الشي غير مثلا طبعا وما بغيناهش لممثل كرة القدم المغربي، واش غيخرج محمد طلال والمدرب زفين فاندنبروك يقولو للوداديين راه دعوات جمهور صن داونز أحسن من دعواتكم داكشي علاش خسرنا؟.. طبعا لا، حيث المدرب خاصو يشرح تقنيا كيفاش وعلاش ربح الفريق أو خسر، وفاش تفوق الخصم ونقاط الضعف ديالو.

ونعطيو مثال بالمنتخب المغربي، واش الانجاز اللي حقق خلال كأس العالم 2022، بالوصول إلى الدومي فينال جا بالدعوات ؟! طبعا لا، راه المغاربة شحال وكيدعيو خلال مرحلة وحيد خاليلوزيش وقبل منها، ومنذ المشاركة الأولى في كأس العالم 1970 والدعوات ما جابت والو، حتى جا جيل زوين عام 1986 وتحقق إنجاز التأهل للدور الثاني من المونديال، وعام 2022 بجيل ذهبي ومدرب مجتهد قدر المنتخب المغربي يحقق دومي فينال كوب ديموند وهو إنجاز غير مسبوق إفريقيا وعربيا، وبالمنطق ديال سي طلال كون كانت الدعوات تقضي الغرض كون قطر ربحت كأس العالم 2022، وهي اللي دارت افتتاح شابع طقوس دينية للمونديال ولكن تقصات من الدور الأول والأكثر من هذا كانت أول منتخب كيودع البطولة.

بحال هذه الخرجات، كتأكد أن بزاف ديال المسؤولين داخل الأندية المغربية خاصهم يكتسبو ثقافة كروية علمية ويمشيو يديرو تكوين رياضي، باش ملي يكون التتويج والانجاز يخرجوا ويشرحوا للجمهور كيفاش جا الانجاز ماشي ينسبوه للدعوات وغيرها من الغيبيات وهذا الشي كذلك بالنسبة للاخفاقات باش هكذا تكون عندنا فالكرة المغربية أسس علمية ماشي تعليق الفشل على شماعة الغيب، وإذا تحدثنا على الوداد الرياضي واللي هو أحسن فريق مغربي حاليا على المستوى القاري، راه فيه رئيس اللي موفر طائرات خاصة على طول الموسم، وجايب مدربين ولاعبين وملي الفريق كيحتاج شي حاجة ما كيهزش يديه ويعطيها للدعوات ولا يقول للوداديين دعيو معنا، بالعكس كينوض يعري على كتافو ويوفر داكشي اللي محتاجو الفريق.

وطبعا كنتمناو للوداد الرياضي ممثل المغرب يربح صن داونز الجنوب إفريقي غدا السبت فدومي فينال عصبة أبطال إفريقيا، ويحقق التأهل للفينال بالكرة والخطط والتكتيك، ويرجع الفريق بالرباح للبلاد