محمد سقراط-كود///

هاد الأيام كاينة حملة على صحاب الماطر، مكاين غير شد ليمن ولي ناقصاه شي ورقة الفوريان، أييه مزيانة هاد القضية باش كاع لي كيرولي في الطريق يكون قانوني، ولي وراقو ناقصين أو فيه التخلويض راه كيحط الموطور في الدار حتى تدوز الحملة ويعاود يهزو، وهادي هي أكبر موشكيلة في البلاد واش ماجاش الوقت فين يولي يتطبق القانون كل نهار العام كامل، وماشي غير حملات موسمية موزعة على القطاعات، هادي حملة على الفساد ضد المنتخبين هادي حملة في المحاكم، لخرى حملة في الموانئ، حملة على الحراكة حملة على تهريب المخدرات والتجارة فيها، حملة على المرشدين السياحيين لي بلا رخصة، حملة على الزرامة في جامع الفنا، حملة على لي كيجمعو الزطاطة في سويقة عوينة الحجاج، وطبعا غير تدوز الحملة كترجع المياه لمجاريها بحال إلى حتى حاجة مكانت، ولي تشد في الحملة راه معندو زهر وصافي، حيت في الوقت لي كيكون هو مشدود وكيتعاقب وحدين بحالو راه كيكونوا خدامين على راسهم حيت الحملة دازت.

مكرهناش نشوفوا القانون كيتطبق في المغرب العام كامل وماشي غير بالحملة، الدولة أيام كورونا بينات لينا أنها عندها الإمكانيات والجهد والقدرة على أنها تسد على المغاربة في ديورهم تلث شهور، إذن راها قادرة تطبق القانون العام كامل، وخصوصا مع صحاب الماطر راه كارثة حقيقية مايمكنش تدوز نهار وماتشوفش شي كسيدة فيها موطور، وكاين للأسف لي كيكونوا أسرة كاملة فوق موطور الأب والأم وجوج ولاد أو تلاتة، وطبعا عند أي قراءة خاطئة للطريق راه كيتسبب في كارثة ماشي غير كسيدة، بلا منهدرو على الوراق مزورين والكاسك مكاينش ولاصورانص ديما مسالية والعديد من المشاكل الأخرى، عاد زيد عليها صحاب البريباراسيون والشاكمات مبدلين هادوك كارثة حقيقية.

مليلية في أرض المغرب وشفت بعينيا كيفاش كيجيو المغاربة على البيكالات حتى لباب الديوانة ويديروا لكاسك ويدخلو، حيت في مليلية البيكالة بلا كاسك مخالفة، وكولشي محتارم القانون ماتلقاش سي مغربي نيت كيدور بالبيكالة بلا كاسك، بينما هاداك المغربي نيت غير كيفوت الديوانة كيحيد الكاسك حيت ماشي قانون هنا، وحتى الكاسك ديال الموطور لي في القانون راه غير إلى جابتك الحملة عاد يهدرو معاك، يعني راه المواطن المغربي مستاعد يحتارم القانون خاص غير لي يحرس على التنفيذ ديالو، والدليل هو سبتة ومليلية وأوروبا، المغربي لهيه كيحتارم القانون كيجي هنا كيبدى غير يخربق في الصوكان، مكرهناش نشوفو مغرب بلا حملات بل كيتحارب فيه الفساد كل نهار العام كامل، وكيتحتارم فيه القانون ويتطبق ديما ماشي من الحملة للحملة.